Гьам гъвечIи хуьре, гьам еке шегьерда хьайитIани, гьар са агьалидиз герекди къулай шартIара уьмуьр кечирмишун я. Инсанар­ яшамиш жезвай чкайра гъвечIибуруз аялрин бахча, мектеб, сагъламвилел гуьзчивал­дай поликлиника, больница, медениятдин, почтадин идараяр хьун чарасуз я. Абуру чи агьалийриз анра кIвалахдай, чирвилер къа­чудай, ял ядай, уьмуьрдин яша­йишдин шартIара агьалийрин тIалабунар кьилиз акъуд­дай мумкинвилер гузва. Гьахьтин идараяр галачиз къе хуьре-шегьерда яшамиш хьун чи фикирдизни къвезвач. Эхь, абур хьун важиблу ятIани, идарайрал, карханайрал­ «чан гъизвайбур» мад гьа хуьреринни шегьеррин агьалияр — пешекарар я. Чпин кIвалах намуслувилелди кьилиз акъудзавай пешекарар. Абурун зегьмет раиж авунни чарасуз я.

За яргъал йисара муаллимвиле кIва­лахна, алай береда пенсияда аваз, Хъар­тас-Къазмайрал яшамиш жезва­. Пенсиядин, газет-журналдин патахъай зун мукь­вал-мукьвал Белиждин почтадин ала­къа­дин отделенидин пешекаррихъ галаз ала­къада жезва. Ширин мецелди рахун, ви гьалдикай-сагъламвиликай хабар кьун, яшдиз гьуьр­метна, ацукьун теклифун, рази жедай жуьреда ваз яб гун, къуллугъ авун и поч­тадин идарадин пешекаррин адетдин кIва­лах я. Агьалийрихъ галаз ихьтин рафтарвал авай алакъадин отделенидин начальникдин везифаяр тамамарзавай Мегьамедрасулова Зарема Дарвиновнадивай за чи куьруь гуьруьшдин тереф хуьн тIалабна. Ада чиник хъвер кваз разивал гана.

– Зарема Дарвиновна, почтадин ала­къадин отделенидин­ кIвалахдикай куьрелди суьгьбет авунай­тIа, хъсан тир…

— Белиждин почтадин алакъадин отде­ление гьукуматдин бюджетдин идара я. Чи идарадиз Дербентдин кьилин почтамтди къаюмвалзава ва чи кIвалахдин еридал гуьзчивални тухузва.

– Куьне ина кIвалахиз шумуд йис я?

— Зун финансист я. Сифтедай кьве йисуз ина за кьилин операторвиле кIвалахна. Гила зал инин регьбервилин везифаяр ихтибарнава.

– Шумуд касди куь гъилик зегьмет чIугвазва?

— Отделенида 9 касди кIвалахзава. Абурукай кьуд почтадин алакъадин къуллугъчияр я, амай вад — почтальонар. Чи пешекарри гьарда вичел тапшурмишнавай везифаяр намуслувилелди тамамарзава. Кьилинди агьалияр чна чпиз ийизвай къуллугъдилай рази хьун я.

– Зегьметдин ери вини дережада хьун патал идарадин къуллугъчий­рин арада кIвалахдинни меслят авунин сихвал гьикI кьиле физва?

— Чи коллективди арада гьуьрмет ва дуст­вал аваз зегьмет чIугвазва. Зи заместитель  Кубачёва Дилара Темирхановнадин, кьилин оператор Абдуллаева Хадижат Захаровнадин ва оператор Мегьамедова Анфиса Тажидиновнадин кIвалахдилай зун пара рази я. Абур вири савадлу, чпин вези­фаяр дуьз тамамарзавай къуллугъчи­яр я. КIвалахдин вири вахт менфятлудаказ­ акъуд­зава. Нетижада чи идарадин къулл­угъчий­ри гьар вацран планар 100% ацIур­зава.

– Почтальонрин зегьметдикай куьрелди ихтилат авунайтIа, кIанзавай.

— Чи къуллугъчийри ва почтальонри­ Белиждин къунши хуьрер тир Нуьгдидин, ЛукIарин агьалийрин почтадин алакъадин­ рекьерай игьтияжриз къуллугъзава. Поч­таль­­онри вахт-вахтунда а хуьрерин агьа­лий­рин истемишунар, чкайрал фена, кьилиз акъудзава,  герек атай вахтунда кардин гъавурда  твазва, меслятар гузва.

– Яшар хьанвай, бейгьал, азарлу, чебни кIвале куьмек авачир агьалийрин истемишунар кьилиз акъудиз жезвани?

— Уьмуьрдин гьар йикъан тIал алай и мес­эла са почтадин идарадиз ваъ, яша­йиш­дин рекьяй къуллугъар агакьарзавай вирибуруз талукьди я.  За чи вири къуллугъчийривай, чкайрал фена, гьахьтин агьалийрин истемишунар кьилиз акъудун тIалабзава.

– Гьакъисагъ зегьмет чIугвазвай, чпелай агьалияр рази тир пешекарриз гьихьтин къимет гузва?

— Гьелбетда, намуслудаказ зегьмет чIуг­вазвай къуллугъчидиз лайихлу къиметни гун герек я. Чи идарада хъсандиз зегьмет чIугвазвайбуруз чухсагъулдин чарар ва пулдин пишкешар гузва.

– Белиждин почтадин алакъадин отделенидин кIвалахдин ери генани вини дережадиз хкажун патал чкадал куьмекар авани?

— Гьелбетда, почтадин кIвалах хъсанарун чкадин администрациядихъ, идарайрин гьакимрихъ, карчийрихъ ва маса тешкилатрихъ галаз авай алакъадилайни аслу я. Белиждин администрациядин сагьиб­ри, гьихьтин хийирдин кIвалах гъиле кьаз хьайитIани, виликамаз са чи идарадиз ваъ, авай вири карханайриз ашкара ийизвайди я. Идахъни еке метлеб ава.

– Зарема Дарвиновна, Куьне вири къуллугъчиярни галаз яргъалди зегьмет­ чIугвазва. Куь кIвалахдиз гьихьтин къимет ганва?

— Чи кьилин сагьибрин гуьзчивилелай ва чи зегьметдиз гьакъикъи къимет гунилай чун рази я. Чаз регьбервал гузвай ксарни чна чIугвазвай зегьметдилай рази я. Имни абуру алатай йисара коллективдиз гьуьр­метдин грамотаяр, чухсагъул малумарнавай разивилин кагъазар гуни тестикьар­зава. Кьилди къачуртIа, 2021-йисуз чи идара, Россиядин почтадин йикъан сергьят­ра аваз, Гьуьрметдин грамотадиз лайихлу хьана.

– Суьгьбет авунай сагърай. Квехъ мадни агалкьунар хьурай!

Эседуллагь  Мегьамедханов