2024-йисан алатнавай варцара производствода тIарвал (хасаратвал) ва я пешекарвилин азаррикди начагъ хьайи 187 дагъустанвиди Россиядин Яшайишдин фондунин (СФР) реабилитациядин центрайра чпин сагъламвал гуьнгуьна хтуна. Идакай «Лезги газетдиз» СФР-дин Дагъустанда авай отделенидин пресс-къуллугъди хабар гана.
Кьилди къачуртIа, чи республикадин агьалияр Кировдин («Вятские Увалы»), Москвадин («Голубая речка»), Астрахандин («Тинаки») областрин ва Волгограддин («Волгоград») махсус центрайриз рекье тунвай. Анра абур патал физический, яшайишдин ва психологиядин рекьерай лазим вири шартIар тешкилнава. СФР-дин реабилитациядин центрайра, яни санаторийра ва курортра, сагъламвал мягькемарун патал анриз гьар йисуз физ жезва. Хасаратвал хьанвай касдиз путёвка гун патал МСЭ-ди (медико-социальный экспертиза) и ва я маса центрада сагъламвал мягькемарун лазим тирди меслятна (рекомендация), яни экспертизади гузвай реабилитациядин программада къейдна кIанзава.
— Производствода тIарвал хьанвай, пешедин рекьяй азарри тади гузвай ксар сагъламвал мягькемардай центрайриз путёвкайралди Яшайишдин фондунин гьисабдай таъминарзава. Ахьтинбурук, виниз тир технологийрин реабилитациядин куьмек агакьзавай категориядик, чеб анжах гьукуматдин кIвалахал алай (официальнидаказ зегьмет чIугвазвай) ксар акатзава. Абур сагъламвал мягькемарзавай чкадиз финин ва элкъвена хтунин рекьерин харжийрайни фондуни алава пул вахкуда, герек атайтIа, — алава отпускдайни. Эгер сагъламвал мягькемариз рекье тунвай азарлудавай маса касдин куьмек галачиз къекъвез жезвачтIа, адахъ гелкъведайдазни яшамиш жедай чка гузва, — гъавурда твазва Дагъустандин Яшайишдин фондунин регьбердин заместитель Шарабудин Даришмегьамедова.
РикIел хкин: реабилитациядин центр, винидихъ къейднавайвал, медицинадин гуьтIуь гьи хилен куьмек лазим ятIа фикирда кьуналди, гьар са кас патал кьилди хкязава. Путёвка къачун патал «Госкъуллугъар» порталда ва я Дагъустандин Яшайишдин фондунин муьштерийрихъ галаз кIвалахдай къуллугъра арза гун лазим я.
Рагнеда Рамалданова
