Бине Кьурагь райондин Штулрин хуьряй тир Шимердан Жамирзаевич Жамирзаев алай вахтунда Къизляр районда кесерлу, тежрибалу муаллимрикай сад я. Ада ина математикадинни физкультурадин тарсар гуз хейлин йисар я.

…1974-йисуз хуьруьн мектебда 8-класс акьалтIарайдалай кьулухъ ам Дербент шегьердин педагогвилин училищедиз гьахьна. Ана чирвилер къачурдалай гуьгъуьниз ада армиядин жергейра къуллугъ авуналди, Ватандин вилик вичин хиве авай буржи кьилиз акъудна. Хуьруьз ам старшинадин чинда аваз хтанай.

Са кьадар вахтунда хайи Штулрин хуьре муаллим яз кIва­лах­на. Шимердан Жамирзаевахъ вичихъ авай чирвилерин сергьятар мадни гегьеншардай къаст авай. И ниятди ам Дагъус­тандин госпединститутдин математикадин факультетдиз акъудна­.

Вуз акьалтIарайдалай кьулухъ жегьил пешекар Къизляр райондин Кохановка хуьруьз акъатна. Гьа чIавалай инихъ ада ина муаллим яз зегьмет чIугвазва.

Лагьана кIанда, Ш.Жамирзаев асул гьисабдай математик ятIани, адахъ  спортдин рекьяйни агалкьунар­ ава. Гьеле Дербентдин училищеда кIел­завай йисара ада шегьерда кьиле физвай спортдин акъажунра иштиракзавай, кIвенкIвечи чкаярни кьазвай.

Хейлин йисара акьалтзавай несилриз дерин чирвилерни­ тербия гунин карда хьанвай агалкьунар фикирда кьуна, Ш.Жа­мирзаеваз са шумуд йис идалай вилик «Россиядин Федерация­дин умуми образованидин гьуьрметлу къуллугъчи»­ тIвар гана. ЦIи тежрибалу муаллим Да­гъустандин жемиятдин вири­далайни кьилин шабагьдиз лайихлу хьана: 1-сентябрдиз, Чирвилерин юкъуз­, Шимердан Жамирзаевав шад гьалара Дагъустандин халкьдин игитдин къизилдин гъед вахкана. Къейд ийин хьи, и шабагь имам Шамилан, Шамил Умаханован тIварарихъ галай мергьяматлувилин фондарини РФ-дин Конституцияди ганвай ихтиярар хуьнин рекьяй Дагъустанда кардик квай центради тешкилна.

Шимердан муаллим хъсан пешекар хьиз, чешнелу хизандин кьилни я. Адан чIехи руш Людмила Сайдумовади ДГУ-дин филологиядин факультет яру дипломдалди акьалтIарна. Гуьгъуьн­лай ада и вуздин экономикадин факультетдани чирвилер къачуна. Алай вахтунда Штулрин мектебда урус чIалан муаллим яз кIвалахзава. Муькуь руша – Светланади – ДГУ-дин тарихдин, хва Арсенани прикладной математикадин факультетра кIелна.

Чи мурад Шимердан Жамирзаевахъ чандин сагъвал, кIва­лахда мадни еке агалкьунар хьун я!

Къази Къазиев, муаллим