Малум тирвал, идалай вилик 6-7, 8-9, 10-11-классра кIелзавай аялар патал ктабар са жилдина аваз акъатнавай. Эхиримижи сеферда 6-7-классар патал пособие 2004-йисуз акъуднай. Адалай инихъ 19 йис алатнава. Ктабар лап кьит тир, абур саки авачир, муаллимриз тарс гуз лап четин хьанвай.
Гзаф муаллимри чаз «Лезги чIал» ктабдин патахъай наразивилер къалурзавай. Гила ктабар кьилди-кьилди чапдай акъуднава. 7-9-классрин ктабар фадлай «Просвещение» издательствода ава. Пулунин такьатар авачирвиляй, абур чапдай акъудзавач.
КIелунин алай йисуз чав шад хабар агакьна. Лезги халкьдин ватанперес, мергьяматлувилин «Иман» фондуниз регьбервал гузвай Фируза Назимовна Керимовади, вичин патай куьмек гуналди 6-классдин «Лезги чIал», «Лезги литература» ва 1-классар патал «Буквардиз гъилин хатIар» ктабар акъуднава. Абурун умуми тираж 22077 ктабдиз барабар я. Алай вахтунда ктабар аялрин гъилера ава ва абурай чирвилер къачузва. Ктабар кIелзавай аялрин кьадардилай артухни яз акъуднава.
А.А.Тахо-Годидин тIварцIихъ галай педагогикадин илимдинни ахтармишунрин институтдин къуллугъчийри, пособийрин авторар тир Къ.Х. Акимова, Ж.Ш. Мейлановади, институтдин директор А.С. Аруховади лезги чIалан муаллимрин, кIелзавай аялрин патай чи баркаллу Фируза Назимовнадиз чухсагъул лугьузва. Куьне лезги чIалан муаллимар ва кIелзавай аялар пара кьадар шадарна. Къуй, Фируза Назимовна, квехъ сагъвал, уьмуьрда бахтар ва кIвалахда мадни еке агалкьунар хьурай! Са шакни алачиз, куьне хайи чIал хуьник еке пай кутуна.
Ж.Ш. Мейланова,
ДНИИП-дин хайи чIаларин
сектордин илимдин къуллугъчи
