(Эвел — 9-10-нумрайра)

И гъилера цавун къапуяр Марьяман хва Исадини Закариядин хва Яхьяди (Аллагь рази хьурай чпелай) ачухна. Пуд лагьай цавара и дуьньядин гуьрчегвилин са пай кьисметнавай Юсуфал (Аллагь рази хьурай вичелай) гьалтна.

Кьуд лагьай цавара — Идрисал (Аллагь рази хьурай вичелай), вад лагьай цавара — Гьарунал (Аллагь рази хьурай вичелай), ругуд лагьай цавара — Мусадал (Аллагь рази хьурай вичелай).

Ирид лагьай цавара Ибрагьимал (Аллагь рази хьурай вичелай). Гьа вахтунда ам Каабадин къаншарда ирид лагьай цаварал алай, гьар юкъуз 70 агъзур малаик къвез-хъфиз, мад хквен тийизвай Байт-уль-Маъмурдив мукьва хьана агалтнавай.

Идалай гуьгъуьниз чи Пайгъамбар (къуй Аллагьдин патай салават ва саламар хьурай вичиз) Жабраил малаикдихъ (Аллагь рази хьурай вичелай) галаз “Сидратуль мунтагьа” лугьудай чкадал кьван агакьна. Идалай виниз са малаикди­вайни экъечIиз жезвачир, вучиз лагьай­тIа, сергьят гьа инал кьван тир.

Якъин Жабраил малаикни (Аллагь рази­ хьурай вичелай) гьанал акъваз хьана, лагьана: “Гьа инал зи дережа куьтягь жез­ва­. Эй Аллагьдин виридалайни кIани лукI, эгер за­ къадам вилик къачун хъувуртIа, зун куда”­.

Пайгъамбар (къуй Аллагьдин патай салават ва саламар хьурай вичиз) Жабраил малаикдивай (Аллагь рази хьурай вичелай) къакъатна ва рехъ текдиз давамарна. Гьа и арада адан вилик квай перде ачух хьана ва адаз чи Халикьдин кьил акъат­ тийидай гзаф кьадар сирлу крар, Адан машгьурвал ашкара хьана. Аллагьди­ адаз, са касни арада авачиз, Вичихъ галаз гуьруьшмиш жедай мумкинвал гана.

И кардин гьакъиндай Пайгъамбарди (къуй Аллагьдин патай салават ва саламар хьурай вичиз) вичи икI лугьуз ахъай­на: “А чIавуз Аллагь-Таалади зи кьиле гзаф шейэр туна, гьакъикъатда, зун инандирмишна. Гьа и йифиз Аллагь-Таалади йикъа 50 сеферда капI авун эмирна.

Гуьгъуьнлай зун ругуд лагьай цаварал Мусадин (Аллагь рази хьурай вичелай) патав агъуз эвичI хъувурла, ада завай жу­зуна: “Вуч эмир гана, вуч савкьат гана ваз ва ви уьмметдиз Аллагь-Таалади?”.

За, гзаф шад яз, жаваб гана: “Йикъа 50 сеферда Вичиз ибадат авун”.

Мусади (Аллагь рази хьурай вичелай) заз меслят къалурна: “Четин жеда, я Расулаллагь, ви уьмметдиз и кар кьиле ту­хуз­, тIалаба Аллагь-Тааладивай са кьадар кьезиларун”.

Дугъриданни, Израилан рухвайрилай, за синемишайвал, алакьначир”.

Пайгъамбар (къуй Аллагьдин патай салават ва саламар хьурай вичиз) Аллагьдин патав хъфена ва тIалабна: “Я Аллагь, зи уьмметдиз кьезилвал ая!”.

“Аллагьдини, тIалабуниз килигна, вадан кьезиларна ва зун мад Мусадин (Аллагь рази хьурай вичелай) патав хтана, адаз вад капI тIимиларна лагьайла, Мусади (Аллагь рази хьурай вичелай) заз лагьана: “Ви уьмметдивай ам кьилиз акъудиз же­дач, вун мад ахлад Аллагьдин патав ва кьезиларун тIалаба!”.

Абдулзагьир  Атаханов