Республикадин Халкьдин Собраниди разивал гайидалай кьулухъ, 14-декабрдиз, РД-дин Кьилин везифаяр вахтуналди тамамарзавай Сергей Меликован Указдалди, Дагъустандин Гьукуматдин Председателвиле Абдулпатах Гьажиевич Амирханов тайинарна.
Указда къейднавайвал, РД-дин Гьукуматдин Председателдал республикадин исполнительный гьукумдин органрин къурулушдин ва Гьукумат тешкилунин жигьетдай теклифар гьазурун тапшурмишнава.
РД-дин Конституциядин 86-статьядал асаслу яз, и кIвалах Гьукуматдин Председателди са гьафтедин къене тамамарун ва абур республикадин Кьилиз теклифун лазим я.
Къейд ийин хьи, Абдулпатах Амирханов 1962-йисан 30-майдиз Хунзах хуьре дидедиз хьана. ДГУ акьалтIарнава. 2020-йисан 11-ноябрдиз А.Амирханов РД-дин Гьукуматдин Председателдин Сад лагьай заместителвиле тайинарна. 24-ноябрдилай РД-дин Гьукуматдин Председателдин везифаяр вахтуналди тамамарзавай.
«Лезги газет»
