Дагъустандин здравоохраненидин министерстводи 15-декабрдиз раиж авур делилралди, алай вахтунда республикадин коронавирус акатнавайбур сагъар хъийизвай духтурханайрин реанимациядин отделенийра 189 кас (абурукай 94 кас — Махачкъалада) ава. Реанимациядин отделенийра авайбурукай 82 кас чпин яшар 65 йисалай алатнавайбур я. ИВЛ-дин аппаратдик (яни, махсус аппаратдин куьмекдалди нефес къачузвайбур) 49 кас кутунва.
РД-дин здравоохраненидин министр Жамалудин Гьажиибрагьимован гафаралди, республикада коронавирус акатзавайбурун кьадар йикъалай-къуз гзаф жезва. И кардихъ галаз алакъалу яз, 2-нумрадин РКБ коронавирус акатнавай азарлубур кьабулиз эгечI хъувунва. Ина абур патал 150 чарпай кардик кутунва.
Дагъустанда тIугъвалдихъ галаз алакъалу гьалар къизгъин жезвайди фикирда кьуна, чарпайрин кьадар мадни артухардайвал я. Алай вахтунда коронавирус акатнавайбур республикадин инфекцийрин азаррин центради, республикадин ва Махачкъаладин клиникадин духтурханайри, РБВЛ-ди, меркезда авай госпиталди ва шегьерринни районрин духтурханайра арадал гъанвай махсус отделенийри кьабулзава.
«Лезги газет»
