ТАСС-ди хабар гузвайвал, РД-дин Кьилин везифаяр вахтуналди тамамарзавай Сергей Меликов духтурханадай ахъай хъувунва. РикIел хкин, 25-ноябрдиз Сергей Меликовак коронавирус акатнавайди тестикь хьанай.
Накь, 15-декабрдиз, республикадин Кьили, интернетдин алакъадин куьмекдалди, Дагъустанда тIугъвалдихъ галаз женг тухунин жигьетдай кардик кутунвай Оперативный штабдин заседание кьиле тухувана. Мярекатдин сергьятра аваз республикада арадал атанвай гьалар, коронавирус акатнавайбуруз медицинадин рекьяй гузвай куьмекдин ери, азарлубур, духтурханаяр бес кьадарда дарманралди таъминарун ва месэлаяр веревирдна.
Заседанидал Каспийск ва Избербаш шегьеррин агьалияр хъсан еридин хъвадай целди таъминарунин месэладизни килигна. И кардин патахъай региондин Кьили РД-дин Гьукуматдин Председателдин заместителдин везифаяр вахтуналди тамамарзавай Инсаф Хайрулиназ кьилдин тапшуругъар гана.
РД-дин Кьилин пресс-къуллугъдин векилди хабар гайивал, и гьафтедин эхирдалди Сергей Меликов духтуррин гуьзчивилик кумукьда.
«Лезги газет»
