Дагъустан Республикадин Конституциядин 78 ва 91 лагьай статьяйрин бинедаллаз РД-дин Кьилин къуллугъ вахтуналди тамамарзавай Сергей Меликова Дагъустан Республикадин Гьукумат отставкадиз ракъурна. Идан гьакъиндай «Лезги газетдиз» РД-дин Кьилин ва Гьукуматдин Администрациядин пресс-къуллугъди хабар гана.
Дагъустан Республикадин Гьукуматдин Председателдин везифаяр кьилиз акъудун вахтуналди РД-дин Гьукуматдин Председателдин заместитель Абдулпатагь Амирхановал тапшурмишнава.
РД-дин Гьукуматдин цIийи состав арадал гъидалди РД-дин Гьукуматдал вичин везифаяр тамамарун давамарун тапшурмишнава.
РикIел хкин, виликдай Россиядин Федерациядин Президентдин Указдалди Дагъустандин Гьукуматдиз регьбервал гайи Артем Здунов вахтуналди Мордовия Республикадин Кьилин къуллугъдал тайинарнай.
Дагъустан Республикадин Кьилин къуллугъ вахтуналди тамамарзавай Сергей Меликован указрин бинедаллаз РД-дин Кьилин ва Гьукуматдин Администрациядани цIийи ксар къуллугърал тайинарнай. ИкI, Алексей Петрович Гьасанов РД-дин Кьилин ва Гьукуматдин Администрациядин руководителвиле тайинарна. Адал къведалди Администрациядиз регьбервал гайи Владимир Иванов вичин хушуналди къуллугъдилай элячIна.
РД-дин Кьилин ва Гьукуматдин Администрациядин правовой управленидин начальниквиле Рабаданов Руслан Мухтарович, Дагъустандин Кьилин секретариатдин руководителдин заместителвиле Омаров Мегьамед Навурбегович тайинарна.
Идахъ галаз сад хьиз, информациядин сиясатдин рекьяй управленидин начальник Зубайруев Зубайру Исаевич, РД-дин Кьилин ва Гьукуматдин Администрациядин руководителдин сад лагьай заместитель Деревянко Владимир Викторович ва къенепатан сиясатдин рекьяй управленидин начальник Хатипов Мегьамед Абдусаламович чеб алай къуллугърикай азадна.
РикIел хкин, вилик квай йикъара Администрациядин къурулушдани са жерге дегишвилер тунай. РД-дин Кьилин указдалди Администрациядин руководителдин заместителрин кьадар садал къведалди тIимиларна ва гьакI къенепатан сиясатдинни чкадин самоуправленидин месэлайрин рекьяй управленияр сад авуна. Идалайни гъейри, Администрациядин къурулушда Сад лагьай отделни тешкилнава.
«Лезги газет»
