26-июндиз Махачкъалада РД-дин Гьукуматдин Председатель Абдулмуслим Абдулмуслимован регьбервилик кваз республикада «Национальная система пространственных данных» (НСПД) программа кьилиз акъудзавай гьалар веревирдна.
Къейд ийин хьи, программадин асул макьсад дагъустанвийриз чпин кIвалерин, эменнидин гьакъиндай авай ихтиярар, документар къанун-къайдадихъ галаз кьадайвал туькIуьрунин карда куьмек гуникай, чилиз, эменнидиз, кадастрдин къиметдиз ва са жерге маса месэлайриз талукь малуматар санал кIватIуникай ибарат я. И кардихъ еке метлеб ва агьалияр патал хийир ава. Мисал яз, тIебиатдин бедбахтвилин дуьшуьшрин нетижада агьалийрин эменнидиз зиянар хьайи чIавуз документар къайдадик квайбуруз энгел тавуна куьмек гуз жеда. Амма гзафбуру и кардиз лазим фикир гузвач.
ТIвар кьунвай программа республикада кьилиз акъудзавай гьалдикай гегьеншдиз вице-премьер, РД-дин чилин ва эменнидин алакъайрин министр Заур Эминова ихтилатна. Адан гафарай малум хьайивал, алай йисан сад лагьай паюнин планда къалурнавай 27-дан чкадал ЕГРН-дик (Единый государственный реестр недвижимости) 30 муниципалитетдин сергьятриз талукь делилар кутунва. Идалай гъейри, ЕГРН-да делилар гьатнавай хуьрерин кьадарди къенин юкъуз 216 тешкилзава. Къейд ийин хьи, къведай йисалай ЕГРН-да делилар гьат тавунвай муниципалитетрихъ эцигунрин кIвалахар кьиле тухун патал ихтиярар гудай мумкинвал амукьдач.
НСПД программа кьилиз акъудун патал вири муниципалитетриз Дагъустандин руководстводи буйругъ ганвай. Заур Эминова хабар гайивал, бязи муниципалитетри и буйругъ кьилиз акъуднавач. Са шумуд сеферда талукь идарайри рикIел хканатIани, абуру (районрин, шегьеррин администрацийри) Росреестрди тайинарнавай формайрин бинедаллаз герек тир малуматар, делилар ганач. Мисал яз, Табасаран райондинни Южно-Сухокумск шегьерди и жигьетдай са жуьрединни кIвалах кьиле тухванвач. Заур Эминова кIвалах лазим тир дережада аваз тешкил тавунвай, гуьгъуьна амай мад са шумуд муниципалитетдин тIварар кьуна.
Чи мухбир
