Украинада женгинин гьерекатар башламишунихъ галаз алакъалу яз,  Кьурагь райондай  къанни вадалай виниз жегьилриз армиядин жергейриз эвер гана. Абуру Донбассдин шегьерар миллетбазрикай хуьн ва азад авун патал женгера иштиракзава. 

Дяве кьиникь, дяве завал, каш-мекь я, — мукьвал-мукьвал тикрардай Ватандин ЧIехи дяведин четин йисар акур чи дидейрини бубайри. Ингье саки кьудкъад йисалай чун мад дяведин  гьерекатрин шагьидар хьанва. Женгера иштиракчияр хьайи са шумуд жегьилди азадвал патал чпин чанар къурбанднава. РикIиз гьикьван туькьуьл  келимаяр ятIани, чун абур рикIел хкуниз  мажбур я.  Чна игит рухвайрин экуь къаматриз икрамзава.

Кьурагь райондай хейлин идарайрин работникри, месела, райадминистрация­дин, райцентрадин сад ва кьвед лагьай нум­райрин юкьван школайрин, райбольницадин пешекарри, гьакI кьилди юлдашрини чпин патай миллетбазрихъ галаз женг чIугвазвай чи аскерар патал чими парталар, недай  шейэр авай  посылкаяр рекье  туна. Къуллугъзавай аскеррин диде-бубайри абуруз чухсагъул лагьана. Кар, белки, ра­къурай шейэрал алач жеди. Кьилинди къайгъуда хьун, аскерри чпин далудихъ, дагълар хьиз, ватанпересар галайди гьисс авун я.

Чаз женг чIугвазвай кьегьал рухвайрин патахъай къайгъударвал ийизвай райондин дишегьлийрин Советдин председатель Эльмира Исаевадиз, агьалияр яша­йишдин рекьяй хуьдай центрадин  начальник Эльб­рус Гьажиеваз, РД-дин Халкьдин Соб­ра­ни­дин депутат Девлетхан Алиеваз, судья Наси­ми Назаралиеваз, гьакI маса юлдашризни рикIин сидкьидай сагърай лугьуз кIанзава. Ватандин вилик чпин пак буржи намуслувилелди тамамарзавайбур абуру чпин хайи веледрай кьуналди, гьар са камуна аскеррин диде-бубайрин гуьгьуьл къачузва, чпин патай гъвечIи-гъвечIи савкьатар рекье твазва, гьакI аскеррин аялрин гуьгьуьларни шадарзава, хизанрин гьал-агьвални фикирда кьазва.

«Чаз аскерар сагъ-саламатдиз чпин хизанрин патав хтана кIанзава», — лугьузва вирида са сивяй.

Абдула  Семедов