Махсус серенжемда миллетчийрихъ галаз кьиле физвай женгера къалурай кьегьалвилериз килигна старшина Мирзабег Заловаз «Багъри Дагъустан» жемиятдин тешкилатди, «Халкьдин фикир» фондуни чIехи къимет ганва. Гзаф миллетрин векилрикай ибарат Дагъустандин халкьдин вилик кьетIен лайихлувилерай «Къизилдин гъед» медални галаз «Дагъустандин Халкьдин Игит» лагьай тIвар ганва.
И йикъара Дербент райондин кьил Мавсум Рагьимова Мирзабег Залован буба Исабег, хала Имара Залова ва маса багърияр кьабулна. Игит махсус серенжемда хьуниз килигна, М.Рагьимова кIватI хьанвайбуруз чIехи шабагь тебрик авуна, Къизилдин гъед Игитдин буба Исабегав шад гьалара вахкана.
Мирзабег Залов 1988-йисуз Дербент райондин Белиж поселокда СПТУ-да мастер яз кIвалахай, вичин бинеяр Докъузпара райондин Къаракуьредай тир Исабеган хизанда дидедиз хьана. Ирид лагьай классдал кьван Г.Лезгинцеван тIварцIихъ галай школада кIелайдалай гуьгъуьниз, ам поселокдин 1-нумрадин школадиз хъфизва. Ина 9-класс акьалтIарай жаван Белиж поселокдин СПТУ-дик экечIна.
18 йис тамам хьанмазди, адаз къуллугъ ийиз армиядин жергейриз эверна. Кьве йисуз Забайкальедин крайдин военный частара: сифте мотострелковый бригадада, ахпа пияда, гуьгъуьнлайни танкарин кьушунра къуллугъ авурдалай кьулухь ам, икьрар кутIунна, армияда акъвазна. Ина ам вичин рикI ацукьай Анастасиядал эвленмиш хьана, кIвал-югъ кутуна, ругуд аялдиз тербияни гуз, вичин военный къуллугъ са лекени квачиз давамарзава. Къуллугъдин рекьяй ам Китайдиз, Сириядиз командировкайриз ракъурна. Инра ада вичихъ авай алакьунар, кьегьалвилер къалурна, дуст халкьарин аскерриз вичин тежрибадикай пай гана. Пешекар военный яз, миллетчийрин вилик пад кьаз, кьве сеферда Украинада кьиле физвай махсус военный серенжемда иштиракна.
Намуслу ва гьакъисагъ къуллугъдай, аскервилин буржи тамамардайла къалурай дирибашвиляй ам сад ва кьвед лагьай дережайрин «Аскервилин жуьрэтлувиляй», «Женгерин гьерекатрин ветеран», Жукован медалриз ва маса шабагьриз лайихлу хьанва.
Чна Мирзабег Исабеговичаз чIехи тIвар мубаракуналди, Ватандин итижар хуьнин карда мягькем сагъвални яргъи уьмуьр хьун алхишзава.
Къагьриман Ибрагьимов
