И йикъара Сулейман-Стальский райондин кьил Нариман Абдулмуталибов райадминистрациядин кьилин заместитель Аким Жаватов ва Кьасумхуьруьн администрациядин кьил Далгат Бабаев галаз 1-группадин инвалид Фарид Таибован тIалабуналди ва райондин депутатрин собранидин депутат Мегьамед Алиеван теклифдалди адан кIвализ фена.

Фарид Таибова 2010-йисуз Дагъустандин госпедуниверситет акьалтIарна, “юриспруденция” пешекарвал къачуна. Вуз акьалтIарайдалай кьулухъ ада Сулейман-Стальский райондин судда секретарвиле кIвалахна. 2012-йисуз ам авариядик акатна, нетижада хьайи тIарвилерикди ам 1-группадин инвалид я.

Фарида мугьманриз вичел ва хизандал, къуншийрал ацалтзавай четинвилерикай, къачунвай чирвилер ва тежриба пешедихъ галаз кьадай са карда ишлемишиз кIанзавайдакай суьгьбетна.

Н.Абдулмуталибова мукьвал вахтара ам вичин пешедай кIвалахдик кутадай мумкинвал жагъурун хиве кьуна. Райондин кьили зайиф, такьатсуз, кефсуз инсанриз куьмек гун гьар садан буржи, гьукуматди уьмуьрдиз кечирмишзавай яшайишдин политикадин кар алай хилерикай садни инвалидрин месэлаяр гьялун тирдал фикир желбна. Имам Яралиеван мергьяматлувилин “Умуд” фондни и рекьяй куьмекар гуз гьазур тирди къейдна.

Таибоврин хизанди Нариман Абдулмуталибоваз гуьгьуьл къачунай ва дикъет гунай сагърай лагьана.

«Лезги газет»