Мукьвара Махачкъалада 1-нумрадин больницада реабилитациядин 20 койка авай цIийи отделение ачухна. Ина нервийрин къурулушдин (ЦНС) ва кьулан тарцин, кIвачеринни гъилерин (опорно-двигательный аппарат) азарар авайбурун сагъламвал мягькемарда. ЦIийи отделенидин палатайра ва кабинетра ремонтар кьиле тухванва, лазим мебель ва тадаракар маса къачунва. Азарлуйриз къулайвал патал лифтни кардик ква.

Отделенидин заведующий Али Супьянован гафаралди, азарлуяр сагъарунин карда реабилитациядин серенжемар вахтунда кьабулунихъни еке метлеб ава. ИкI, азарлуйрин сагъламвал мягькемарунин кIвалах интенсивный терапиядин палатайра башламишзава, гуьгъуьнлай цIийи отделенида сагъарунин лазим серенжемар кьабулун давамарзава.

Больницадин кьилин духтур Гьажимурад Малаеван тапшуругъдалди гьар са азарлу патал кьилди программа туькIуьрзава. Аник фармакологиядин куьмекдихъ галаз сад хьиз мануальный терапия (терапевтди азарлуди гъилерин куьмекдалди сагъарун), ЛФК, рефлексотерапия, массаж, физиотерапия ва маса къайдаяр акатзава. Сир туш, сагъламвал мягькем хьун азарлудан гуьгьуьлдилай ва вич сагъ хъхьуник умуд кутунилайни аслу я. Гьавиляй цIийи отделенида больницадин психологрин куьмекдикайни гегьеншдаказ менфят къачуда.

«Лезги газет»