Дагъустан Республикадин Кьилин ва Гьукуматдин Администрациядин тапшуругъдалди исполнительный властдин руководителар чкайрал фена агьалияр кьабулунин сергьятра аваз Дагъустандин МЧС-дин регьбер Нариман Къазимегьамедова Мегьарамдхуьруьн районда агьалияр кьабулна. Идан гьакъиндай “Лезги газетдиз” райондин муниципалитетдин пресс-къуллугъди хабар гана.
Агьалияр кьабулунин карда Мегьарамдхуьруьн райондин администрациядин кьил Фарид Агьмедова, райондин собранидин депутатри, республикадин бязи ведомствойрин къуллугъчийри иштиракна.
Н.Къазимегьамедован патав чпин дердияр, месэлаяр гваз райондин 11 агьали атана. ИкI, Азадогъли хуьруьн администрациядин кьил М.Яралиева ва школадин директор Н.Рамазановади хуьруьз газ гъунин месэла акьалтIарун патал куьмекун тIалабна.
Муьгъверганрин ва Гилийрин агьалийри (А.Мегьамедов, Т.Эгьмедханов) багълар, салар дигидай яд датIана бес тежезвайдакай, гатун варцара къаналда яд ерли тежезвайдакай шикаятна. Абуру Самур вацIалай башламиш жезвай къаналдин кьил ци тухун тийидайвал туькIуьрунин месэла кудна.
Филерин, ЦIийи хуьруьн ва Бут-Къазмайрин администрацийрин кьилери ва депутатри (А.Эмиргьамзаев, П.Къаибов, В.Якьубов, Р.Урдуханов) агьалияр бес кьадарда хъвадай целди таъмин тежезвайдакай лагьана. Малум хьайивал, и хуьрериз хъвадай яд тухун патал проектар туькIуьрнава. Гележегда пуд хуьруьн агьалиярни хъвадай целди таъминарда.
Са шумуд касди чеб кIвалахдалди таъминарунин гьакъиндай лагьана.
Н.Къазимегьамедова агьалийрихъ дикъетдивди яб акална. Къейд авур вири месэлаяр республикадин талукь идарайрин руководителрив агакьардайди ва абур вичини гуьзчивиликай хкуд тийидайди малумарна.
«Лезги газет»
