Алатай йисан эхирра Москвада Вирироссиядин студентрин «Твой ход» форумдин нетижаяр кьуна. Адан сергьятра аваз, уьлкведин саки вири регионрай тир 17 агъзурдалай виниз студентрин илимдин кIвалахриз килигна. Сифте сефер яз и форумда Даггосмедуниверситетдин кьве студентди гъалибвал къазанмишна. ИкI, конкурсдин «Делаю» кьилин хиле Милана Гьажимурадова ва Даниял Шабанов тамам 8 вацра кьиле тухвай ахтармишунрай ва яшайишдинни сагъламвилин рекьяй важиблувал авай проектар арадал гъунай гьар сад са миллион манатдин кьадарда аваз грантриз лайихлу хьана.
«Илим ва университетар» милли проектдин сергьятра аваз кьиле тухузвай и форумдин макьсад уьлкведин жуьреба-жуьре регионрай илимдал машгъул бажарагълу жегьилар майдандиз акъудун, арадал гъизвай затIарихъ (разработки, проекты) галаз таниш хьун, абурун тереф хуьн, куьмек гун, кьилиндини гележегда а проектар менфятлудаказ ишлемишун я. 2019-йисалай Президентдин къарардалди кьилиз акъудзавай милли проектри илимдал машгъул ксариз «къацу экв» гузва.
Чи студентрин кьве проектни фикир желбдайбур я. Даниял Шабанова — ДГМУ-дин педиатриядин студентди — илимдинни ахтармишунрин «Вейпар ва халкьдин сагъламвал» проект теклифнава. Гележегдин духтурди вейпри жегьилрин сагъламвилиз гьихьтин зиян гузватIа ва чIуру хесетдин вилик пад кьунин серенжемар къейднава. Ада сагълам уьмуьр тухунихъ элкъуьрнавай чирвилерин программаяр уьмуьрдиз кечирмишун теклифзава.
Милана Гьажимурадовади алай вахтунда дерматовенерологиядай ординатурада чирвилер къачузва. Ам Махачкъалада дидедиз хьана. Адан буба Марат Гьажимурадов СтIал Сулейманан райондин Ичинрин хуьряй я, диде Алиева Гуьльнара — Вини Къурушдилай. 2017-йисуз Махачкъаладин 1-нумрадин гимназия акьалтIарай руша гъвечIи чIавалай вичин рикI алай духтурвилин пеше хкяна. ДГМУ ада яру диплом къачуналди акьалтIарна. 2021-йисуз, 4-курсуна кIелдайла, М. Гьажимурадовади «Россиядин башчияр» конкурсдани «Студентар» хиляй гъалибвал къазанмишна. И конкурсда дагъустанвийрикай гъалибвал къачур ам са кас тир.
— Хамунин азарар сагъаруниз за гъвечIи чIавалай итиж ийизвай. Абурукай гзаф кIелдай, зун абур арадал атунин себебрай кьил акъудиз алахъдай. Гьавиляй за ординатура дерматовенерологиядин хиляй кIелун кьетIна. Конкурсдин зи проект — «Арада мензил аваз меслятар гудай чат-бот ДокОнлайн» — Дагъустандин иллаки дагълух чкайра яшамиш жезвай агьалийриз медицинадин рекьяй къуллугъ авун кьезиларунихъ галаз алакъалу я. Кьилди къачуртIа, и программадин куьмекдалди духтурдин патав фин виликамаз меслят ийиз жезва, вахт тайинарзава, — къейдзава М. Гьажимурадовади.
Алукьнавай цIийи йисуз къуй азарлуйрин кьадар тIимил хьурай. Жегьилрин агалкьунри чун мадни шад авурай!
Рагнеда Рамалданова
