2025-йисан февралдиз Каспийскдин Али Алиеван тIварунихъ галай Спортдин имаратдин мулкунал Агропромышленностдин «ДагАгроКаспий» 3-форум кьиле тухун пландик кутунва. Мярекатдин тешкилатчияр РД-дин хуьруьн майишатдин ва недай суьрсетдин министерство, «Дагъустандин теплицаяр» ассоциация, республикадин багъманчияр, прунзчияр ва майвачияр я.
И йикъара РД-дин хуьруьн майишатдин ва недай суьрсетдин министерствода агропромышленный форумдиз гьазурвал акунин месэла веревирдна. Совещанида хуьруьн майишатдин министрдин заместителри, министерстводин къурулушрин пешекарри иштиракна. Форумдиз гьазурвал аквазвай жуьредикай «Дагъустандин теплицаяр» ассоциациядин регьбер Арсен Жамалутдинова лагьана. ИкI, кьве йикъан вахтунда Россиядин регионрай ва къецепатан са жерге уьлквейрай тир 100-далай гзаф компанийри алай аямдин техника, технологияр, тумар, ветеринариядин дарманар, алафдик кутадай кфетлу шейэр, яни чилел зегьмет чIугвазвай, суьрсет гьасилзавай ксариз нетижалудаказ кIвалахун патал герек жезвай шейэр майдандиз акъудда.
Совещание кьиле тухвай РД-дин хуьруьн майишатдин ва недай суьрсетдин министрдин сад лагьай заместитель Шарип Шарипова Дагъустандин агропромышленный комплекс патал и форумдин важиблувиликай лагьана. Адан метлеблувал артухарзавай делил ам я хьи, форум гатфарин чуьлдин кIвалахар кьиле тухуз гьазур жезвай вахтунда тешкилзава. Гьаниз килигна, хуьруьн майишатдин хиле кIвалахзавайбур и ва я маса агропрепаратар, технологияр жагъурун патал региондилай къецепатаз финиз мажбур жедач. Мярекат кьиле тухузвай майдандал гьакIни ватандин агропромышленный комплексдин гьар жуьре хилера зегьмет чIугвазвай пешекаррихъ галаз меслятардай мумкинвал жеда.
«Карчивилиз талукь тир и майдан Дагъустандин хуьруьн майишатдин хиле игьтияж авайдаз элкъвенва — чи республикада форум тешкилиз им пуд лагьай сефер я. Чна форумдин сергьятра аваз кьиле тухудай гуьруьшрин, яни карчивилин программани девлетлуди хьун гуьзлемишзава. Спортдин имаратдин ачух майдандал техникадин выставка тешкилда, малдарвилин, кIевирнавай чилел суьрсет гьасилунин, багъманчивилин, уьзуьмчивилин ва АПК вилик тухунин рекье кьетIен фикир гузвай, кар алай са жерге маса хилерай элкъвей столар тешкилдайвал я. И месэлайриз РФ-дин хуьруьн майишатдин министерстводини, Дагъустан Республикадин Кьилини кьетIен фикир гузва», — лагьана Ш.Шарипова.
Ада къейд авурвал, Дагъустандин фермервилин майишатарни активнидаказ виликди физва. И жигьетдай лежберрин, фермеррин, гьакIни и хиле зегьмет чIугвазвай алимрин арада алакъаяр тайинарунин, сада масадан тежрибадикай менфят къачунин жигьетдай выставка лап хъсан мумкинвал я.
Амина Муслимова
