И йикъара Хабаровскда залан атлетикадай кьиле фейи Россиядин чемпионатда чи ватанэгьли, вичин ери-бине Докъузпара райондай тир Исмаил Гьажибегова (55 кг-дал къведалди заланвал авайбурун арада), рывокдин ва толчокдин нетижада 225 кг хкажуналди, гимишдин медаль (гила кьвед лагьай сеферда) къазанмишна.
РикIел хкин: тренер Гьуьсейхан Закарьяеван (шикилда) гъилик вердишвилер къачузвай И.Гьажибегов алатай йисуз Ханты-Мансийскда залан атлетикадай кьиле фейи Россиядин чемпионатда 1-чкадиз лайихлу хьана. Дагъустандин залан атлетикадин цIийи тарихда чи республикадин патай экъечIуналди, ам Россиядин чемпионвилин тIварцIиз лайихлу хьанвай сад лагьай спортсмен я. Вири санлай чи ватанэгьлиди а чIавуз 230 кг (рывокда -100 кг, толчокда — 130 кг) хкажнай. Им адахъ галаз бягьсиниз экъечIай К.Рябыха хкажайдалай 8 кг-дин гзаф тир. Идалди чи ватанэгьлиди Старый Оскол шегьерда Россиядин Кубок патал акъажунра къалурай агалкьун мад сеферда тикрар хъувунай…
Чна виликдайни хабар гайивал, алатай йисан акъажунрилай кьулухъ чи ватанэгьлидин кьуьнт операция авуниз мажбур хьана. Ам исятдани тамамвилелди сагъ хъхьанвач. Тренердин гафаралди, кьуьнт себеб яз, И.Гьажибегова кьвед-пуд вацра тренировкайрикай ял яда. Ахпа ада “пьедестал масадав вугун намумкин я”.
Чи мухбир
