И мукьвара ЦIийи Гъуьгъвезрин хуьре “Намус хуьзва!” лишандик кваз “Кьиблепатан Дагъустандин спортдин къугъунар — 2022” кьиле фена. Абура Ахцегь, Докъузпара, Мегьарамдхуьруьн, СтIал Сулейманан районрай ва Дагогни, Избербаш шегьеррай армиядин жергейриз эверзавай яшарин жегьилри иштиракна. Хъсандиз тешкилнавай акъажунрин шартIара жегьилри спортдин жуьреба-жуьре рекьерай къуватар, алакьунар къалурна.

ИкI, армрестлингдай акъажунра Равил Тагьирбегов, Агьмед Къурбанов ва Давид Ризванов гъалиб хьана. Турникдал виридалай гзаф  сеферра чене (подтягивание)  Давида акъудна. 24 килограммдин пут виридалайни яргъаз Мурсал Мегьтиханова гадарна. Амма судьяярни тамашачияр 9 йисан яшда авай Давид Ризванован (чилелай 305 сеферда отжимание авуна) устадвили иллаки гьейранарна. “Эвелимжи нубатда, им зи бубадин ва тренердин агалкьун я”,- агъайнавилелди лагьана гъве­чIи пагьливанди.

Турнирда Шихагьмед Шихагьмедова пневматикадин винтовкадай лишанар кьунай, Анзор Мирзоевани Мурсал Мегьтиханова акъвазай чкадилай яргъаз хкадарунай, 100 метрдин мензилдиз чукурунай ва СтIал Сулейманан райондин жегьилри цIил ялунай лап хъсан нетижаяр къалурна. Гъалиб хьайибур грамотайризни медалриз ва турнирдин спонсор, меценат Нариман Гъазалиеван патай пулдин премийриз ла­йихлу хьана.

— Спортдин и турнир чна Украинадин на­цистрихъ ва абуруз куьмек гузвай НАТО-ди­н уьлквейрихъ галаз женг чIугвазвай Рос­сиядин къудратлу армиядин тереф хуьн яз ва военный махсус серенжемда игитвилелди телеф хьайи чи ватанэгьли, жегьил офицер Тамерлан Ильясован экуь къаматдиз бахшна кьиле тухузва. Мурад-метлеб акьалт­завай несил куьчедин чIуру таъсирдикай хкудун, жегьилар руьгьдизни чандиз мягькем халисан ватанпересар яз тербияламишун я, — лагьана турнирдин тешкилатчи, армрестлингдай РФ-дин спортдин мастервиле кандидат, Гъуьгъвезрин школадин муаллим Исамудин Шагьэмирова.

Разивилелди къейдин, республикада жегьилрин крарин рекьяй РФ-дин Гьукуматдин сиясат кьиле тухунин серенжемра активнидаказ иштиракунай Шагьэмиров Исамудин Имамединовичаз Дагъустандин жегьилрин крарин рекьяй министр К.Саидован къул алай Чухсагъулдин чар ганва.

Чандин сагъвал ва жемиятдин крара вахъ мадни еке агалкьунар хьурай, Исамудин стха!

Дашдемир Шерифалиев