РД-дин хуьруьн майишатдин ва недай суьрсетдин министерстводи и йикъара хабар гайивал, Россиядин центральный регионрин базарар республикадай малдарвилин суьрсет кьа­булун патал ачухнава.

Министерстводин ветеринариядин управленидин начальник Сергей Попандопулоди суьгьбет авурвал, талукь тир дегишвилер Россельхозпродди кутунва.

“Россиядин Федерацияда гьайванар санай масаниз тухунин кIвалах Россельхознадзорди 2017-йисан 20-январдиз кьабулай “Гьайванрин садакай масадак акатдай азарриз ва Госветнадзордин гуьзчивилик квай метягь санай масаниз тухунин шар­тIариз талукь яз Россиядин Федерациядин регионрин дережаяр тайинарунин гьакъиндай” къарардал кIе­ви­даказ амал авуналди тамамарзава. 26-февралдиз Россельхознадзорди, дабакь азар авайла, шейэр санай масаниз тухунин шартIарик дегишвилер кухтунва. Икьван чIавал­ди Кеферпатан Кавказдин ва Кьиблепатан федеральный округда арадал гъизвай малдарвилин вири суьрсет гьайванриз дабакьдиз акси рапар язавай регионрилай къерехдиз тухунал къадагъа эцигнавай. Россиядин центральный регионра  и азардиз талукь  серенжемар кьиле тухванвачир. Гьаниз килигна, Россельхознадзордин къарардал асаслу яз, анриз Россиядин кьиблепатай  малдарвилин суьрсет тухудай ихтияр авачир. Амма гьам  винидихъ лагьанвай федеральный округрин субъектрин кьилери, гьамни АПК-дин управленийрин, ветеринариядин къуллугърин руководителри тавакъу авурдалай кьулухъ къарардик дегишвилер кухтунва”, — гъавурда твазва управленидин начальникди.

Инал къейд авун лазим я хьи, дегишвилер чан алай гьайванриз талукь туш. Абур уьлкведин центральный регионриз тухунал къадагъа гьикI виликдай алайтIа, гьакI исятдани алазва. Малдарвилин суьрсет ги­ла Москвадиз, Санкт-Петербургдиз ва Россиядин маса регионриз тухудай ихтияр ава, — гьелбетда, ветеринариядин ва санитариядин са жерге истемишунриз жаваб гунин шартIу­налди.

Хабар гузвайвал, ихтилат гьихьтин шартIарикай физватIа, Дагъустандин малдарривай ва карчийривай республикадин шегьеррин ва районрин ветеринариядин управленийрай, я тахьайтIа, РД-дин хуьруьн майишатдин ва недай суьрсетдин министерстводай чириз жеда.

Жасмина Саидова