Мукьвара Санкт-Петербург шегьерда кьиле фейи “Вирироссиядин сочиненийрин конкурсда” 7-классда кIелзавай чи руш Луиза Руслановна Къадировади 1-чка кьуна.
Луиза 2005-йисан 29-декабрдиз Сулейман-Стальский райондин Герейханован хуьре дидедиз хьана. Адан са йис хьайидалай кьулухъ хизан Санкт-Петербургдиз куьч хьана.
Луизади ингилис чIалаз кьетIен фикир гузвай 556-нумрадин мектебда кIелзава. Алай вахтунда ам “Театрдин студиядизни” физва, аялрин тамашайра жуьреба-жуьре ролра къугъвазва.
Жуван чIал, хайи халкьдин уьмуьр, тарих хъсандиз чир хьун ва гьакIни багърийрал кьил чIугун патал Луиза гьар гатуз вичин диде-бубадихъ галаз Дагъустандиз хквезва.
Дидед чIалаз талукь конкурс кьиле физвайдакай хабар хьайила, Луизадин рикIин кьарай квахьна, ада вичин дердерикайни “РикIин гьарай” тIвар алай сочинение кхьена. Анай къачунвай са чIук газет кIелзавайбурун фикирдизни гъизва.
Нарима Агьмедова
РикIин гьарай
— Диде! Гьикьван рикIиз чими, иер гаф тушни! Дидеди чирай, диде кьван рикIиз чими тир дидед чIал, хайи чIал — лезги чIал. Дидед чIал, дидед чIал — бубайрилай аманат чал. Дидед чIалакай гзаф рахазва чун, шиирар кхьизва, макъалаяр, ктабар акъудзава. Амма хайи чIалал рахадайбурун кьадар югъ-къандавай тIимил жезва.
И карди рикI тIардачни бес?! Эгер чна хуьн тавуртIа дидед чIал, пака къвезмай несилрин вилериз гьикI килиграй? Са вахтара ацIанвай дагъдин хуьрер йисалай-суз ичIи жезва. Жегьилар, кьил хуьз чIехи шегьерриз акъатзава.
Шегьерра, са шумуд халкь какахьнавай хуьрерани дидед чIалал рахадайбурун кьадар тIимил я.
Бязи лезги хуьрерани дидед чIалал ваъ, урус, азербайжан чIаларал рахазва. Жуван хайи чIал аваз-аваз, масадбурун чIалал? Им вуч аламат я?! Квез хизанда лезгидал рахаз чирначни? Квез дидейри лезги махар ахъайначни, лезги манияр лагьаначни? Квез лезги ктабар кIелначни? Етим Эминан, Кьуьчхуьр Саидан, СтIал Сулейманан, Хуьруьг Тагьиран шиирар кIелначни?!
Бес вучиз далу гузва чна дидед чIалаз? КIвачерик вучиз вегьезва?
Эхь, зунни кьвед-пуд чIалал рахазва. Амма виридалайни рикI алайди, виридалайни верцIиди зи дидед чIал я.
Луиза Къадирова
