Куьруь къейд.

Гьажи Ражабович Жабраилов 1934-лагьай йисуз Кьурагь райондин Гелхенрин хуьре дидедиз хьана. Одессада выс­шай инженерный училище акьал­тIар­­на, “энергетиквилин” пеше къачуна. 1955-1964-йисара ада са шумуд организацияда жавабдар къуллугърал кIва­лах­на. 1965-йисуз ам меха­низирован­ный­ 88-нумрадин колоннадин кьилин инженервиле, ахпа начальниквиле эцигзава. 1979-1982-йисара ам 6-нумрадин СМУ-дин начальник, 1982-йисалай  Дербентдин кIвалер эцигдай комбинатдин начальник хьана. 1996-йисалай инихъ “Дагюгстрой” ОАО-дин генеральный директор я. Адаз пуд велед ва 35 хтулни птул ава.

Гь.Жабраилова регьбервал гузвай кар­­ханадин вилик чlехи планар ква. Чун агъунва, гьинай чаз и компаниядин ван атайтlани, ам анжах тарифдинди же­да. “Дагюгстрой” — им виниз тир еридин­ ва ихтибарвилин чешне я.

Чна Гьажи Жабраиловаз чlехи тIвар мубаракзава ва адаз мягькем сагъламвални яргъи уьмуьр хьун алхишзава.­

 И йикъара Дербент шегьерда кардик квай “Дагюгстрой” ОАО-дин коллективдин шадвилин собрание кьиле фена. Мярекат и карханадин регьбер, технический илимрин кандидат, Международный энергоинформационный академиядин “Гьакъисагъвилин зегьметдай” академик, “Дагъустан Республикадин лайихлу эцигунардайди”, “Эцигунра лайихлувилерай” ордендин, “За доблестный труд” медалдин ва “КIвалах гузвайдаз их­тибар авунин сертификатдин” сагьиб, Кьурагь райондин ва Дербент ше­гьердин гьуьрметлу агьали тир Гьажи  Ражабович  Жабраиловав  “Дагъустандин Халкьдин Игит”  ла­гьай чlехи награда вахкуниз талукьарнавайди тир.

Халкь патал гзаф важиблу метлебдин крар гъиле кьаз, кlвалахда цlийивилер тваз, гьамиша вилик жергейра авай  Гьажи Жабраилован зегьметдиз “Багъри Дагъустан” общественный гьерекатди — реги­ондин “Халкьдин фикир” фондуни чlехи къимет ганва. Гзаф миллетрин  векилрикай ибарат Да­гъустандин  халкьдин вилик лайихлувилерай “Къизилдин гъед” медални галаз награда вахкуналди, адаз “Дагъустандин Халкьдин Игит” лагьай тlвар ганва.

Шадвилин мярекатдал рахай “Багъри Дагъустан” общественный гьерекатдин — региондин “Халкьдин фикир” фондунин регьбер, шаир Гьабиб Давудова, кьилди къа­чур­тIа, лагьана:

— Гьажи Ражабович, вичин инсанвилин,  намуслувилин, камаллувилин ерийриз килигна, чешне къачуниз лайихлу кас я. Гьелбетда, и наградадик инсанрин хушбахтвал патал галатун тийижиз зегьмет чlугвазвай адан коллективдин пайни ква.

Ада вичин рахунра къейд авурвал,  региондин “Халкьдин фикир” фондуни интернетда ва халкьдин арада тухвай хабарар кьунин нетижада Гьажи Жабраилов агьалийри “Йисан Инсан” яз, чIехи ватанперес, интернационалист, баркаллу эцигунардайди, камаллу инсан ва зурба регьбер яз гьисаб­нава.

Рикlел хкин, “Дагюгстрой” компания алатай асирдин 90-йисара Дербентдин кlвалер эцигдай комбинатдин чкадал арадал атайди я. Гьа йисара­ баркаллу коллективди шегьердин кеферпата яшайишдин кIвалерин цIийи чIехи микрорайон арадал гъана. Ингье саки 35 йисан къене шегьер аваданламишиз, инсанриз яша­миш жедай къулай, ери авай кlва­лер хкажиз, аялар патал школаяр, бахчаяр, соц­культбытдин объектар эцигиз,  лап гьуьндуьр дережадиз хкаж хьанвай коллективдиз эцигунардай производстводин хъсан тешкилатчи, бажарагълу пешекар, жегьилрин камаллу насигьатчи Гьажи Ражабовича регьбервал гузва.

“Дагюгстрой” ОАО-ди анжах са Дербент шегьер­да кlвалахзавач. Эцигунардай къурулушда хъсан авторитет хьуниз килигна, абурал Каспийск, Избербаш, Къизляр, Махачкъала шегьерра, чи районра ва республикадилай къе­це патани имаратар хкажун ихтибарзава. Ви­ри муьштерияр квалди абуру чпихъди чlугвазва? Гьел­бетда, кIвалахар виниз тир еридивди та­мамаруни, меслят жезвай вахтарал, проектрал амал авуни ва гъил агакьдай къиметри.

“Дагюгстрой” кархана чlехи коллектив я. Ина 300 касдилай виниз рабочийри ва пешекарри гьа­къисагъ­ви­лелди зегьмет чlугвазва. Кол­лектив­дин­ ва ру­ководст­водин зегьметдиз гьу­ку­мат­ди лайихлу къимет ганва, гьуьрметдин грамотайралди, премийралди, дипломралди ва сертификатралди къейд­нава.

Карханада работникар яша­йишдин, мари­фатдин рекьяй гьевесламишдай къайда кардик ква. Лап хъсандиз кlва­лахзавай  работникриз премияр, учирдал амал авуна, кьезил къиметрай кlва­лер гузва. Работникриз кlвалахдай ва ял ядай хъсан шартlар яратмишнава ва мажибарни хъсанбур гузва. Медпунктни кардик ква.

Алай вахтунда карханади Дербент шегьердин кьиблепата ирид гектардин чилел “Кьиблепад” тlвар алай яшайишдин кIвалерин цlийи микрорайонда  5 мертебадин 9 кlвал хкажзава. Ина  школа, аялрин бахча, поликлинника, алишверишдин центр, гаражар эцигнава ва эцигзама, эквер, тlебии газ, яд гъанва, канализациядин коллектор, трансформатордин подстанция эцигнава  — са гафу­налди, чlехи пай кlвалахар бегьемарнава.

СССР чкlайла, са бязибуруз чукlуриз кlан­завай карханани, коллективни, вич къастунал кlеви инсан хьуниз килигна, Гьажи Ражабовичалай хуьз алакьна, гуьнгуьнани хтуна, гила Дагъустандин эцигунардайбурун  хиле вилик жергейрани ава.

Къагьриман Ибрагьимов