КОМСОМОЛДИН — 100 ЙИС

Варцари йисар, йисари асирар эвез ийиз, вахтуни гьамиша виликди еримишда. Им тIебиатдин къанун я. Идахъ галаз­ сад хьиз, девирар, къурулушарни дегиш же­да. Амма са бязи крар, вакъиаяр вахтариз муьтIуьгъ туш: тарихда гьат­нава­тIа­ни, абуру инсанрин рикIера чпикай хуш майилар тада. Жегьил рабочийрин, лежберрин ва кIелзавайбурун социалистический союзар тешкилиз эге­чIай 1918-йисалай вичин тарих башламиш хьайи комсомолдин тешкилатарни къе амач. Уьлкведихъ галаз санал четин, гьа са вахтунда баркаллу рехъ фейи комсомолди алай йисуз 100 йис тамам хьунин юбилей къейдзава.

Чи зурба уьлкведа хьиз, Сулейман-Стальский райондани ВЛКСМ-дин райкомитет, идарайрани карханайра, школайрани майишатра комсомолдин сифтегьан организацияр, комсомолдин бригадаярни звенояр кардик квай.

1969-1980-йисара вичин тIвар Дагъустан Республикадилай яргъарани машгьур тир Кьасумхуьруьн консервиярдай заводдани комсомолрин сифтегьан организация кардик квай. Адан секретарвиле хейлин йисара Ягъи­бег Рамазанович Ягъибегова кIвалахна.

— Кьасумхуьруьн консервиярдай заводди неинки чи республикадин, гьакIни Советрин Союздин гзаф маса шегьерар, гьабурукай яз Москва, Ленинград хъсан еридин продукциядалди таъминарзавай, — суьгьбетзава комсомолдин ветеран Я.Ягъибегова. — КIвалахда жезвай агал­кьун­рай заводдиз 14 сеферда РСФСР-дин ва 12 сеферда СССР-дин Министр­рин Советдин ва ВЦСПС-дин гъиляй-гъилиз къведай Яру пайдахар ганай. И агалкьунрик заводда кIва­лах­­завай комсомолрин ва жегьилрин зегьметдин еке пай квай.

1970-йисара заводдин комсомолрин организацияда 200-далай виниз членар авай. И тешкилатдиз саки 10 йисуз Ягъи­бег Рамазановича регьбервал гана. И йисара комсомолдин организация неинки районда, гьакIни республикада промышленный карханайрин арадани вилик жергейра авайбурукай сад тир.

Заводдин консервиярдай цехда 1970-1976-йисара комсомолринни же­гьилрин смена тешкилнай, ана 70 касди кIвалахзавай. Сменадин начальниквилени Ягъибег Ягъибегов тайинарнай.

— Бегьерлу кIвалахди хъсан нетижа арадал гъизвай, гьар са касди, чIугур ­зегьметдиз килигна, хъсан мажиб, алава гьакъи, премияр къачузвай йисар тир, — давамарзава ихтилат Я. Ягъибегова. — Са сменада чна 110-140 агъзур шартIу­нин банка консервияр акъудзавай, сезондин вахтунда абурун кьадар мадни гзаф тир.

Советрин девирда консервиярдай заводдиз гьар йисуз пуд вацран вахтунда Дагъустандин вузрай 1000-далай ви­низ студентарни куьмекдиз къвезвай. Абуруз ина ял ядай, кIвалахдай къулай  шартIарни яратмишзавай.

Комсомолринни жегьилрин бригадайрин, звенойрин ва сменайрин арада социалистический соревнование кьиле тухун консервиярдай заводда адет хьанвай кар тир. Адан нетижаяр гьар кварталда, гьар вацра кьадай, тафаватлу хьайибуруз заводдин дирекциядин, ВЛКСМ-дин райкомдин грамотаяр, вымпелар, премияр гудай, кIвенкIве­чийрин шикилар заводдин Гьуьрметдин доскадиз акъуддай.

Ягъибег Ягъибегова чаз лагьайвал, заводдин комсомолрин организация 1971-йисуз КПСС-дин XXIX съезд лайих­луда­каз къаршиламишун патал Вирисоюздин социалистический соревнованидик экечI­на. Хъсан нетижаяр къалурай ор­ганизация ВЛКСМ-дин ЦК-дин секретарь Сапегадин къул алай грамотадиз ва рикIел аламукьдай вымпелдиз лайихлу хьанай.

— Чна инал рикIел хкизвай вакъиаяр алатна хейлин йисар хьанватIани, абуру чи тарихда мягькем ва баркаллу гел ту­на. Уьмуьрда комсомолдихъ галаз ала­­къалу хьунални за къе дамахзава. ГьикI лагьайтIа, уьлкведин, республикадин уьмуьрда комсомоларни жегьилар вилик жергейра хьайиди я, — лугьузва РД-дин хуьруьн майишатдин лайихлу ра­ботник Ягъибег Рамазановича.

Хазран Кьасумов