Чи ватанэгьлияр — гьар сана
Илимдин, искусстводин, медениятдин ва маса рекьера алакьунар къалурзавай жегьил ватанэгьлияр чи арайра гзаф ава, амма вирибурун агалкьунрикай, бажарагъдикай, яратмишунрикай хабар тахьун тIебии кар я. Интернет хьтин алакъадин аламатдин такьатдикай менфят къачузвай девирда инсанрикай, чкайрикай, затIарикай хабар хьунин, малуматар агакьунин кар са кIусни четин туширдаз элкъвенва.
И йикъара интернетда дуьшуьшдай заз жегьил лезги художник Зарина Гуьлагьмедовна Магьарамовадин яратмишунар акуна. Малум хьайивал, алай вахтунда ам Чечняда яшамиш жезва.
З.Магьарамова 1989-йисуз Махачкъалада дидедиз хьана. 2009-йисуз ада М.А.Жемалан тIварцIихъ галай Дагъустандин художественный училищедин живописдин отделение куьтягьна, “художник-живописец, преподаватель” пешекарвилин дережа къачуна. Шикилар чIугунал гзаф рикI алай ва и рекьяй вичихъ бажарагъни авай жегьилди вуздик экечI хъувун кьетIна. 2015-йисуз ада ДГПУ-дин художественно-графический факультет акьалтIарна.
“Яратмишунар зун патал цIийивилер ачухунин, руьгьдинни медениятдин жигьетрай еримлу хьунин гьерекат я”, — кхьенва жегьил суьретчиди интернетда кардик квай вичин блогда.
Жуьреба-жуьре рангарилай гъейри, художникди шикилар адетдин къелемдалдини чIугвазва. Яратмишунрин, кIвалахдин рекье жегьил пешекардихъ хъсан агалкьунарни хьанва. 2012-йисуз Зарина Гуьлагьмедовна “Художник-педагог” конкурсда гъалиб хьана. Гьа и йисуз ам “Художник-педагог” конкурсда-выставкада, “Живопись, суьрет” номинацияда1-дережадин дипломдиз лайихлу хьана.
2010-йисуз ада Дагъустандин лайихлу художникрин ва студентрин выставкада, 2012-йисуз Махачкъалада “Дагъустандин художникрин кIвалахар”, 2013-йисуз “Пленер-2013”, “Аламатдин макъам”, ДГПУ-дин “Зи Дагъустан”, 2014-йисуз “Дагъустандин вахтар” выставкайра иштиракна. 2015-йисуз Москвада “Живопись” номинацияда художественный вузрин студентрин яратмишунриз талукь конкурсда 2-дережадин дипломдиз лайихлу хьана. 2020-йисузни адахъ вини дережадин конкурсра, жуьреба-жуьре выставкайра агалкьунар хьана.
Къазанмишнавай агалкьунри шагьидвалзавайвал, З.Магьарамова гележег авай суьретчи я.
К.Ферзалиев
