ЦIининди вичин вири уьмуьрда халкьдиз къуллугъ ийизвай, Кьурагь райондин администрациядин финансрин отделдин заведующий хьайи, “ракьун финансист” тIвар къазанмишай Будаев Рамазан Шабановичан 90 йисан юбилейдин йис я. Кьурагьрин хуьруьн Квелцик магьледай тир кьелечI якIарин, яшлу, зирек итим тийижир кас чи районда бажагьат жеда.
Зегьметдин ветеран Рамазан Будаеваз алай вахтундани секинвал авач. Ада куьмек герек хьана вичин патав атай кас гьакI рахкурдач. Адан кьисмет, кар, санлай ирс жегьил несилар патал акьалтI тийир руьгьдин чешне ва чешме я.
— Зун 1927-йисан 7-ноябрдиз Кьурагь райондин Кьурагьрин хуьре дидедиз хьана. Зи буба Шабана 1912-йисалай 1957-йисалди Бакудин Ленинан тIварунихъ галай парча храдай комбинатда фяле яз кIвалахна, — суьгьбетзава ада.
— 1935-1936-кIелунин йисуз за Кьурагьрин тамам тушир юкьван школадин сад лагьай класс куьтягьна. Гатун каникулриз диде Периханахъ галаз дахдин патав Бакудиз фена. Ина Шаумянан райондин 63-нумрадин юкьван школада 6-классдалди кIелна. Ватандин ЧIехи дяве башламиш хьайила, зи диде аяларни галаз Кьурагьиз хтана, буба Бакуда кIвалахиз амукьна. Кьурагьа за юкьван школада 7-класс кIел хъувуна.
Гьа йисуз, чи чIехи хизандин дуланажагъдин шартIар четин хьуниз килигна, зун Кьурагьрин райбольницадин счетоводвиле кIвалахал акъвазна. Анай райфинотделдиз хтана, бухгалтервиле тайинарна. А вахтунда 15 йисни тамам тахьанвай, зун пуд вацра Махачкъала шегьерда авай бюджетдин идарайрин инспекторрин ва бухгалтеррин пешекарвал хкаждай курсариз кIелиз ракъурнай. И курсар хъсан нетижаяр аваз куьтягьайдалай гуьгъуьниз Кьурагь райондин финотделдин кьилин бухгалтервиле тайинарна. 1944-йисан 4-июлдиз акъатай СССР-дин Верховный Советдин Призидиумдин Указдалди, 7 ва мадни гзаф аялар авай, гьакIни, текдиз аялар хуьзвай дидейриз са сеферда пулдин куьмек, орденар ва медалар гунин къайда тайинарна ва цIийи отдел кардик кутуна.
Гьа вахтунда финансовый отделдин заведующий Рамазанов Мавлудина зун и отделдин старший бухгалтер яз тайинарна. 1951-1954-йисара финансрин министерстводин КРУ-дин контролер-ревизор, гуьгъуьнлай райондин финансрин отделдин заведующий хьана. Са кьадар вахт арадай фейила Дагъустан АССР-дин финансрин Министерстводи зун Кьасумхуьруьн райфинотделдин старший инспекторвиле тайинарна.
1964-йисан мартдилай зун мад Кьурагь райондин финотделдин заведующий яз кIвалахал акъвазна. Ина за 2000-йисан 1-июлдалди, яни пенсиядиз фидалди кIвалахна.
КIвалахдай вахтунда Рамазан Шабанович чирвилер къачунивай къерех хьанач. ИкI, ада Минфиндин КРУ-дин контролер-ревизор яз кIвалахдай вахтунда Канашский финансовый техникумда контролер-ревизоррин пешекарвал хкаждай пуд вацран курсара кIелна.1953-йисуз Бакудин финансово-кредитный техникумдиз заочнидаказ, ахпа Ростов шегьерда авай финансово-экономический институтдиз гьахьна, 1980-йисуз ам Ленинград шегьердин райгорфинотделдин заведующийдин курсар кIелиз ракъурна.
Пенсиядиз фейидалай кьулухъ Рамазан бубади, райондин администрациядин финансрин отделдин руководителдихъ галаз икьрар кутIунна, ревизор яз кIвалахун давамарна.
Вири уьмуьрда халкь, район патал зегьмет чIугур Р.Будаеваз цIудралди медалар, гьуьрметдин грамотаяр, лайихлу тIварар, чухсагъулдин чарар ава.
Рамазан Будаевахъ хъсан хесетар гзаф ава, ам хийир-шийирдикай къерехда акъваздач, гъвечIи-чIехи лугьун тийиз, рекьяй фидай аялни саймишда. Алай вахтунда вичин бубадин тIвар алай хва Шабанан патав гва. Рамазан Шабановичахъ 7 велед, 20 хтулни 40-дав агакьна птулар ава.
Ада райадминистрацияда собранийрал, заседанийрал гьахълувал патал сес хкаждай. Эхь, гьа ихьтин кас я Кьурагьрин машгьур финансист Рамазан Будаев.
Чилел виридалай еке къуллугъ инсан хьун я лугьуда. Рамазан Будаева и къуллугъ лап хъсандиз тамамарзава.
Адан уьмуьр цIийи несилдиз лайихлудаказ яшамиш хьунин чешне я. Эхь, им гекъигун авачир ирс я!
Чаз Рамазан бубадиз вич дидедиз хайи югъ рикIин сидкьидай мубаракиз кIанзава. Квехъ чандин сагъвал, хизанда берекат ва гьуьрмет хьурай.
Адинат Мамедова
