Мукьвара Россиядин халкьари Чехи Гъалибвилин 76 йисан юбилей шад гьалара къейдда. И зурба вакъиадиз уьлкведин гьар са пипIе гьазурвилер аквазва. ГьакI Дагъустандини. Каспийск шегьерда суварин еке парад жеда. Адан репетиция 26-апрелдиз тухвана. Ана Каспийскдин флотилиядин, республикада авай милли гвардиядин, къенепатан кьушунрин ва маса частарин векилрини иштиракна.
Репетициядин вилик квай юкъуз Каспийскдин флотилиядин начальстводи республикадин СМИ-рин векилриз зениткайринни ракетайрин комплекс алай “Татарстан” гимида экскурсия тешкилна.
Гимидиз хкаж жедалди вилик чаз дивизиондин командирдин замполит Сабир Гунешова флотилиядин тарихдиз талукь бязи малуматар гана.
2018-йисуз Россиядин оборонадин министерстводи флотилиядин кьилин база Каспийскдиз ахкъудунин къарар кьабулна ва 2020-йисуз ам кьилизни акъудна. Флотилиядин къурулушдик гимийрин, береговой кьушунрин ва артиллериядин катеррин са шумуд бригада ва дивизион акатзава. Каспий гьуьлуьн майданар “Волгодонск”, “Град Свияжск”, “Великий Устюг”, “Углич”, “Татарстан”, “Дагестан”, “Махачкала”, “Ступенец”, “Астрахань” гимийри хуьзва ва абур нубатдалди са гьафтедин, са вацран сефердиз гьуьлел экъечIзава.
— Бригадада къуллугъзавай контрактникрин 80 процент чкадин гадаяр я. Вирида чпин везифаяр уставди ва командирри истемишзавай къайдада тамамарзава. Виридаз ина хъсандиз къуллугъдай, ял ядай, спортдал машгъул жедай шартIар тешкилнава, — лугьузва С.Гунешова. — Мажиб вахт-вахтунда гузва. ТIуьнрилай, хуьрекрилай наразивалзавач. Чешнелудаказ къуллугъзавайбурув гьар жуьредин шабагьарни агакьзава. Гьар са команда сефердиз гьуьлел экъечIдалди вилик ахтармишзавайди я. Сагъламвилин, руьгьдин, психологиядин, сефердиз гьазур хьунин жигьетдай. ИкI тахьайтIа, тапшуругъ тамамарзавай вахтунда гуьзлемиш тавур дуьшуьшар хьун мумкин я. Чна ихьтин крариз рехъ гузвач. Гьихьтин тапшуругъдиз фейитIани, команда вичин вилик эцигнавай учебно-боевой везифаяр баркаллувилелди кьилиз акъудна хквезва. Гьа са вахтунда командади вичин гимидин гьакъиндайни датIана къайгъу чIугвазва. Ам чешнелу къайдада аваз хуьзва.
Командованиди флотилияда къуллугъзавайбурун яшайишдин месэлаяр гьялунизни еке фикир гузва. Абур патал яшайишдин 128 квартирадин кIвалер эцигнава. 508 квартирадин кIвалерни эцигиз гъиле ава. Чаз малум хьайивал, уьлкведин маса флотилиядин къуллугъчийрив гекъигайла, Каспийскдин флотилиядин морякри еке мажибар къачузва. Гьавиляйни иниз къуллугъиз мореходный училищеяр, вузар куьтягьзавайбур хушвилелди къвезва.
“Татарстан” гимидин 3-рангдин капитан Владимир Поденежныйди чун хушдиз кьабулна ва ада зениткайринни ракетайрин комплексар алай военный гимидикай итижлу малуматар гана. Гимидин яргъивилел 100 ва гьяркьуьвилел 13 метр ала. Гимида виш морякди ва офицерди къуллугъзава. Гимидал алай яракьривай са четинвални авачиз цававай ва гьуьлел алай военный техника ягъиз жезва. Гимидин кьве къвалахъ ракетайрин комплексар гала. Вилик кьиле туп ава. Юкьвал зениткайрин кьуд комплекс ала. Са шумуд миномет ава. ПК-16 комплексдин са снаряддихъ са гими тергдай къуват ава. Ихьтин тупар адал 150 ала. Са йис вилик “Татарстан” гимиди халис ученийра иштиракна ва гимидал алай вири яракьар ахтармишна, ишлемишна. Тайинарнавай вири лишанар яна, кукIварна.
Гимида морякриз къуллугъдай, ял ядай, кIелдай, чирвилер артухардай, ксудай, хуьрекар недай вири шартIар ава. Гьар мертебада телевизорар, радиояр ава. Чна ихтилатар авур морякри чпин къуллугъдилай ва тешкилнавай шартIарилай лап разивална.
Республикадин журналистриз акуна хьи, Каспийскдин флотилиядин Махачкъаладин бригада уьлкведин ва Дагъустан Республикадин сергьятар, аслу туширвал, агьалийрин секинвал хуьн патал гьамиша гьазур я. Абуру узягъдиз 9-Майдиз Каспийск шегьерда кьиле тухудай Гъалибвилин суварриз талукьарнавай параддани иштиракда.
Нариман Ибрагьимов
