Алай йисан 18 ва 19-ноябрдиз Москвада набут ва сергьятламиш хьанвай мумкинвилер авай ксари пешекарвилин бажарагъ къалурунин ва абур кIвалахдалди таъминарунин макьсад аваз тешкилзавай “Абилимпикс” тIвар алай Милли V чемпионатдиз хкядай акъажунар кьиле фида. Абуруз Дагъустандани гьазурвилер аквазва. ИкI, Хасавюртда, Аграрно-экономический колледжда (АЭК), республикадин “Абилимпикс” чемпионатда гъалиб хьайи гадайрини рушари пуд пешедай — “Делилрин базайрин крар идара авун”, “Web-разработка”, “Экономика ва бухгалтервилин гьахъ-гьисаб” — чпин пешекарвилин устадвал хкажзава.
Республикадин “Абилимпикс” чемпионатдин “Делилрин базайрин крар идара авун» пешедай эксперт Гьажи Гьажиева винидихъ тIвар кьунвай кIелунин идарада акъажунриз гьазурвилер гьикI аквазватIа суьгьбетна.
— Колледжда Милли чемпионатдиз гьазурвилер акун патал инин директор Абдулрагьим Бексултанова теклифнавай махсус методикадикай менфят къачузва. ИкI, тестерин куьмекдалди сифте нубатда студентрин психикадиз (руьгьдиз) талукь и ва я маса нукьсанар дуьздал акъудзава, яни абуруз кIвалахда манийвилер гун мумкин тир месэлаяр чирзава. Ахпани абур арадай акъуддай серенжемар кьабулзава, студентрихъ галаз и жигьетдай кIвалах тухузва, — къейдна ада.
И месэладиз талукь яз АЭК-дин психолог Мадина Сатиаджиевади лугьузвайвал, акъажунриз гьазурвилер акунин карда адан иштиракчийрин психикадин рекьяй дурумлувал хкажунихъ элкъуьрнавай кIвалахдиз артух фикир гузва.
— Набут ва сергьятламиш хьанвай мумкинвилер авай ксари жуьреба-жуьре олимпиадайра, конкурсра… гъалибвилер къазанмишун абурун психикадин мягькемвилелай, дурум гуз алакьунилай гзаф аслу я. Къенин юкъуз абуру чпин мумкинвилерихъ инанмиш яз и жуьредин акъажунра иштиракунни чна еке агалкьун яз гьисабзава. Вучиз лагьайтIа, гзаф кьадар инсанар авай чкада, вердиш тушир шартIара хьунни ахьтин ксар патал еке имтигьан я. Гьаниз килигна, адетдинбурулай аслу яз, набут ва сергьятламиш хьанвай мумкинвилер авай ксари и жуьредин акъажунра неинки чпин алакьунар, чирвилер, гьакI руьгьдин (психикадин) дурумлувални хцивал къалурзава. Психолог яз, за туькIуьрнавай тестери абурун гьазурлухвал ахтармишиз куьмекзава, — къейдна М.Сатиаджиевади.
Адан гафарай мадни малум хьайивал, Москвада кьиле фидай Милли чемпионатда Дагъустандай 12 касди ва 11 экспертди иштиракда. Абуру чпин алакьунар 12 пешедай къалурда.
Регина Семедова
