Сардархуьруьн сергьятда бинеламиш хьанвай МЧС-дин 25-нумрадин пожарный частунинни Курхуьруьн 2-нумрадин юкьван мектебдин арада дуствилин алакъаяр аваз гзаф вахт я. Частунин къуллугъчияр мектебдиз къвезва, аялрихъ, муаллимрихъ галаз гуьруьшмиш жезва, чпин четин, жавабдар везифайрикай суьгьбетарзава, цIа-яр кьунин вилик пад кьадай серенжемрин, ишлемишдай тадаракрин гьакъиндай гъавурдик кутазва.
Ингье и мукьвара пожарный частунай чпин махсус машинни гваз цIаяр хкадардайбур мектебдиз мугьман хьана. Анин директор Абдулазизов Эмирулагь кьилеваз, муаллимри мугьманар хушвилелди къаршиламишна. Абур мектебдин дараматдиз, адан сергьятда авай чкайриз, цIаяр кьунин вилик пад атIудай гьихьтин тадаракар аватIа тамашна, сигнализация, махсус лишанар эцигнаватIа килигна. Акур затIарилай, авай гьазурвилелай цIаяр хкадардайбуру разивал авуна, кьилдин журналдани и крар къейдна. Ахпа отделенидин командир, вичихъ 25 йисан тежриба авай Нагъдалиев Лачина, расчетдин член, пожарник Абасов Алберта, цIаяр хкадардай машиндин шофер Гьуьсейханов Нурдина аялар, муаллимар машиндин патав кIватIна, чпи кIвалахда (герек макъамда) ишлемишзавай тадаракринни алатрин, абуру гьикI кIвалахзаватIа нубатдалди суьгьбетар авуна, тежрибадин бязи кIвалахарни къалурна.
Мектебдин ОБЖ-дин муаллим Рустамов Ажимамеда огнетушителар ишлемишдай къайда чирна. И мярекатда аялризни, муаллимризни цIаяр кьунин вилик пад кьунин, хкадарунин рекьерай гзаф крар, гьакIни чIуру гьалар арадал атай вахтунда чеб тухудай къайдаярни чир хьана.
Мектебдин директорди мугьманриз чухсагъул лагьана.
Райсудин Набиев
