Дагъустан Республикадин къенепатан крарин министерстводи алай йисан 3-июлдиз акъудай “2019-йисуз полициядин участковый уполномоченныйри административный участокрин агьалийрин вилик гьахъ-гьисабар авунин гьакъиндай” 1/435-нумрадин буйругъдин бинедаллаз Россиядин МВД-дин Сулейман-Стальский районда авай отделдин участковый уполномоченныйри махсус графикдин бинедаллаз агьалийрин вилик чпи тухвай кIвалахдикай гьахъ-гьисабар ийизва. ИкI, и йикъара Кьасумхуьруьн административный 1-нумрадин участокдиз къуллугъзавай полициядин лейтенант Ризван Радикьович Гьажалиева агьалийрин вилик вичин кIвалахдин гьахъ-гьисаб авуна.
Хуьруьн администрацияда кьиле фейи собранида участокда яшамиш жезвай агьалийри, хуьруьн администрациядин кьилин пешекарри, административный участокда кардик квай идарайрин кьиле авай ксари, диндин, жемиятдин тешкилатрин, РОВД-дин ва СМИ-рин векилри иштиракна.
Собрание хуьруьн администрациядин кьилин заместитель Фазил Мамедярова ачухна ва кьиле тухвана.
2019-йисуз хуьруьн административный 1-нумрадин участокда вичи тухвай кIвалахдикай гегьеншдаказ рахай РОВД-дин участковый уполномоченный, полициядин лейтенант Ризван Гьажалиева къейд авурвал, полициядин участковый уполномоченныйдин кIвалах 2019-йисан 29-мартдиз 205-нумрадик кваз акъудай “Полициядин уполномоченныйри чпи къуллугъзавай административный участокда къуллугъ кьиле тухунин ва ам тешкилунин гьакъиндай” приказдихъ галаз кьадайвал кьилиз акъудна.
— Гьахъ-гьисабдин вахтунда участокда тахсиркарвилер дуьздал акъудунин, общественный къайдаяр хуьнин рекьерай тайин кIвалах тухвана. Административный участокда 7069 кас яшамиш жезва. Гьахъ-гьисабдин девирда зи кIвалахни гражданрин саламатвал, ихтиярар ва азадвал хуьнихъ, тахсиркарвилерин вилик пад кьунихъ, учетда авайбурухъ (абур 10 кас ава) галаз гъавурда тунин кIвалах тухунихъ галаз алакъалу хьана. И девирда хьайи вири тахсиркарвилер дуьздал акъудна. Гзаф серенжемар чна ДПС-дин, ППСП-дин, УУП-дин, ПДН-дин пешекаррихъ галаз санал тухузва, гьа жергедай яз административный участокда гьерекатда авай автотранспорт ахтармишзава. Кьилди къачуртIа, ПДН-дин пешекаррихъ галаз санал чна жегьилрихъ, Кьасумхуьруьн 1 ва 2-нумрайрин юкьван школайра кIелзавайбурухъ галаз терроризмдикайни экстремизмдикай, наркоманиядикай авай зияндикай ва маса месэлайрай суьгьбетар авуна, маса мярекатар тешкилна. Чи участокда са мискIинни кардик ква. Аниз къвезвайбурухъ галазни чун мукьвал-мукьвал гуьруьшмиш жезва, диндин месэлайрикай, ахлакьдикай ихтилатар ийизва, лазим тир профилактикадин кIвалах тухузва, — къейдна ада.
Малум хьайивал, гьахъ-гьисабдин девирда участковыйдин тIварцIел агьалийрилай 53 арза атана. Абур вири ахтармишна, законрихъ галаз кьазвай серенжемар кьабулна. Гьар са арзадиз кьилди-кьилди килигна. Агьалияр графикдин бинедаллаз даяхдин пунктуна кьабулзава, абурун арзайрихъ, дердийрихъ яб акалзава. Агьалийрив чпин участковыйдин телефондин нумраяр кхьенвай карточкаяр, дежурный частунин, “ихтибарвилин” телефонрин нумраяр гва. Зенг авуна, гьар са касдивай тах-сиркарвиликай, чпиз акур чIуру кIвалахрикай хабар гуз жезва.
Собранидал Фазил Мамедяров, Кьасумхуьруьн мискIиндин имам Юсуф Къурбанов, райондин къенепатан крарин отделдин участковый уполномоченныйрин отделенидин начальник, полициядин майор Жафер Саидалиев, общественный хатасузвал хуьнин рекьяй полициядин начальникдин заместителдин везифаяр тамамарзавай подполковник Расим Эмирбегов, хатасузвал хуьнин рекьяй Кьасумхуьруьн 2-нумрадин юкьван школадин пешекар Насир Абукаров, РОВД-дин яшар тамам тахьанвайбурухъ галаз кIвалах тухунин рекьяй старший инспектор, полициядин майор Валерий Ибрагьимов ва маса юлдашар рахана. Абуру Кьасумхуьруьн 1-нумрадин административный участокдин участковый уполномоченный, полициядин лейтенант Ризван Гьажалиева гьахъ-гьисабдин девирда тухвай кIвалахдиз рази жедай къимет гана.
Хазран Кьасумов
