19-мартдиз Сергей Меликова Дагъустан гатфарин призывдиз гьазур жезвай гьалариз талукьарнавай совещание кьиле тухвана.­

«Алай йисан гатфарин призывни хъсан гьалара кьиле фидайдак за умуд кутазва», — лагьана республикадин регьберди, совещанидин иштиракчийрихъ элкъвена.

И месэладиз талукь яз алай вахтунда республикада кьиле тухузвай мярекатрикай РД-дин военкомдин везифаяр вахтуналди тамамарзавай Замирбег Куьрабегова малумат гана. Адан гафаралди, военный комиссариатди призывдик акатзавайбурун сиягьар гьазурнава ва абуруз виридаз и кардикай хабар гузва. Региондин сборный пунктни жегьилар кьабулун ва абур къуллугъ ийиз кьушунрин частариз рекье тун патал герек вири шартIаралди таъмин я.

С.Меликова муниципалитетрин кьилеривай чкайрал гатфарин призыв тешкилуниз кьетIен фикир гун истемишна, гьикI хьи, шегьерра, районра авай призывдин комиссийрин кIвалахдилай санлай призыв кьиле фидай гьал аслу я.

«Лезги газет»