Баркаллу тухумдин векил
Чкади инсан ваъ, инсанди чка машгьурда, — лугьузва бубайрин мисалда. Гьа икI вич алай чка раиж авур инсанрик цмурви Гьажи-Къурбан Шайдаевни акатзава. Гьажи-Къурбан Шайдаев 1932-йисан 15-майдиз Кьасумхуьруьн райондин Цмуррин хуьре дидедиз хьана. Ада хуьре 7 йисан ва Кьасумхуьруьн юкьван школайра кIелна.
1948-йисуз Дербентдин педагогвилин училище акьалтIарай хци зигьин авай гада Дагъустандин СтIал Сулейманан тIварунихъ галай педагогвилин институтдик экечIна. Жегьил пешекарди кьве вацра Цмуррин 7 йисан школадин директорвиле, гуьгъуьнлай Кьасумхуьруьн юкьван школада муаллимвиле кIвалахна.
Гь.-Къ. Шайдаеваз 1952-йисуз Советрин Армиядин жергейриз эвер гана ва ада Польшада къуллугъна. Младший лейтенантдин чинда аваз хтай ада са йисуз ВЛКСМ-дин Дагъустандин обкомдин вузрин ва школайрин отделдин заведующийвиле кIвалахна.
1955-йисуз Шайдаев Каспийскдин аялрин тербиядин колониядин юкьван школадин директорвиле, са тIимил вахтундилай аялрин колониядин директорвиле тайинарна.
Дерин чирвилер, хци кьатIунар авай Гьажи-Къурбан Гьажибалаевич къуллугъдин кIарарай къвердавай виниз хкаж хьана. И кар ада тамамарай къуллугърай ачухдиз аквазва.
1959-йисуз Шайдаев КПСС-дин Каспийск шегьердин комитетдин секретарвиле хкяна. 1960-1962-йисара ада Каспийск шегьердин Советдин исполкомдин председателвиле кIвалахна.
Ахпа 1972-йисан декабрдалди Дагъустандин къенепатан крарин министрдин заместителдин, 1-заместителдин ва министрдин везифаяр кьиле тухвана.
1985-йисан майдалди СССР-дин МВД-дин Вирисоюздин институтдин начальниквиле кIвалахна. 1979-йисуз Шайдаеваз МВД-дин къенепатан къуллугъдин генерал-майорвилин чин гана.
Гьажи-Къурбан Гьажибалаевич 1985-1991-йисара СССР-дин МВД-дин Академиядин доцент яз хьана. 1991-1997-йисара ада Россиядин Федерациядин Президентдин къвалав гвай Дагъустан Республикадин гьамишалугъ векилвилин, гьа са вахтунда РД-дин Гьукуматдин Председателдин заместителвилин жавабдар везифаяр намуслудаказ кьилиз акъудна.
Гь.-Къ.Шайдаеван яргъал йисарин намуслу, бегьерлу зегьмет “Знак Почета” орден, “Дагъустан Республикадин вилик лайихлувилерай” ва маса медалар, “Дагъустандин государственный къуллугъдин лайихлу работник”, “СССР-дин илимрин лайихлу деятель”, “СССР-дин МВД-дин лайихлу работник” лагьай тIварар гуналди къейдна.
Гьажи-Къурбан Гьажибалаевича район, хайи хуьр аваданламишуник, общественный дараматар эцигуник, хуьруьнвийрин яшайишдин ва дуланажагъдин шартIар хъсанаруник еке пай кутуна, и кIвалахриз миллионралди хсуси такьатар харжна. Хуьруьнвийри лугьузвайвал, ада Цмуррин хуьруькай дагъда авай шегьер авуна.
Гьажи-Къурбан Гьажибалаевич къе чи арада амач, ам 2019-йисан 17-майдиз рагьметдиз фена. Амма ада ва Шайдаеврин тухумди авур, ийизвай крар-кIвалахар амазма. ЧIехи несилдин баркаллу крар тухумдин жегьил несилди давамарзава.
«Лезги газет»
