Алай йисуз вичи неинки лезги, гьакl маса миллетрин литературайрани кьетlен гел тур шаир Алирза Саидован 90 йис тамам хьанва. И лишанлу вакъиадиз талукь яз Кьурагьрин сад лагьай нумрадин юкьван школада, шаирдин уьмуьрдиз ва яратмишунриз талукьарна, дидед чlалан муаллим Самедова Гьамията ачух тарс тухванвай. Ам акьван устадвилелди кьиле фена хьи, гилани чи рикIелай алатзавач.
И йикъара Кьурагьрин централизованный библиотекадани шаирдин экуь къаматдиз бахшнавай мад са мярекат тешкилнавай. Аниз райондин саки вири идарайрин векилар, Кьурагьрин сад ва кьвед лагьай нумрайрин юкьван школайрин, Штулрин тамам тушир юкьван школадин дидед чlалан муаллимар, аялар атанвай.
Мярекатдал Штулрин школадин дидед чlаланни литературадин муаллим, шаир Эфендиев Сабира метлеблу рахунар авуна, шиирар кIелна.
Гуьгъуьнлай Кьурагьрин сад лагьай нумрадин юкьван школадин дидед чlалан ва литературадин муаллим Абдула Семедова таъсирлу суьгьбетна, вичин кьисметда шаирди еке гел тунвайди къейдна.
Райондин культурадинни туризмдин ва азад вахт кечирмишдай центрадин работник Фейзуллаева Кевсеран рахунрини кlватl хьанвайбурун бейнида дерин гел туна. Ада вичини А.Саидован руш Минаята Тифлисда театральный институтда санал кlелдай вахтунда А.Саидовахъ галаз хьайи гуьруьшмишвиликай гегьеншдаказ ихтилат авуна.
Гуьгъуьнлай Кьурагьрин сад ва кьвед лагьай нумрайрин юкьван школайрин аялри Алирза Саидован шиирар хуралай кlелна. Ингье чаз чи акьалтзавай несилдихъни дидед чlал хуьнин ва адан сергьятар мадни гегьеншарунин карда кьетlен бажарагъ авайди ачухдаказ акуна.
Кьурагьрин кьвед лагьай нумрадин юкьван школадин муаллим Катибова Зилфиради, Фейзуллаева Кевсера аялрихъ галаз Алирза Саидован “Фатима” мани устадвилелди тамамарна. Вичиз алатай асирдин пудкъад лагьай йисарин эвел кьиляй Омар Аюбова музыка теснифай и манидини кlватl хьанвайбурун гуьгьуьлар шадарна.
А.Мамедова