2021-йис патал газетар, журналар кхьидай вахт эхирдиз мукьва жезва. И кардихъ галаз алакъалу яз, заз газет кIел­­­завай­бу­рухъ элкъвена, икI лугьуз кIан­зава.

Гьуьрметлу лезги стхаярни вахар! Сифте нубатда, квез алукьзавай ЦIийи йис мубаракрай! Ам шадвилеривни берекатрив ацIайди хьурай!

Чун яшамиш жезвай чка, чи ватан — Лез­гистан, хейлин маса мулкарив ге­къи­гай­ла, Аллагьди берекатлу чил яз халкь­нава­. Чахъ гьуьл, дуьзенар, дагълар, багълар… вири ава. Амма вучиз ятIа­ни ихь­тин чилел уьмуьр тухузвай бязи инсанрин рикIер дар я. Гафунин кьилиз “Сагъ­рай, лезгияр!” лугьудайбур гзаф ава, кардал гьалтайла — тIи­­мил. Гзафбуру, мумкинвилер аваз, халкьдин умуми са кардик чпин пай кутазвач, куьмек гузвач, масадан дердиникай хабар кьазвач, тух тежезвай нефсер ацIуриз алахънава…

Заз тираждал гьалтайла къвердавай кIеве гьатзавай чи багъри “Лезги газетдикай” кьве гаф лугьуз кIанзава. Са вахтара газетдин тираж 15 агъзурдав агакьзавай. Чи йикъара лагьайтIа, 5 агъзурдал аватнава. “Лезги газет” чи хайи чIал хуьзвай кьилин такьат я. Гьавиляй ам кхьиник чна вирида пай кутуна кIанда.

Играми газет кхьизвайбур! Куьне куь мукьва-кьилийризни газет кхьиниз эвер це. Мумкинвилер авай стхайри, вахари дарда авай хизанриз савкьат яз “Лезги газет” кхьейтIа, еке сувабдин кар я. Гьа и къайдада, санал, чавай чи хайи газетдин тиражни хкажиз жеда.

Куьн вири Аллагьди хуьрай! Жуван эвер гун заз “Лезги газет” кхьихь, дустар, куьн сагърай!” шиирдалди акьалтIа­риз кIан­зава.

 

Гьар гьафтеда вил ала чи хемис къал,

Хуш яз гуьгьуьл “Лезги газет” хтунал.

Лезги халкьдин гуьзгуь я вун, зид таб туш,

Гьам гъвечIидаз, гьам чIехидаз я вун хуш.

“Лезги газет” кхьихь, дустар, куьн сагърай!­

 

“Лезги газет” аваз хьурай гьар кIвале,

Акваз хьурай гьар лезгидин ам гъиле.

Сада-садаз цIийи хабар це куьне,

Чи газетдин тираж хьурай мад вине,

“Лезги газет” кхьихь, дустар, куьн сагърай!­

 

Чаз Аллагьди ганва гуьрчег тир Ватан,

ТIварни вичел эцигнава “Лезгистан”.

Йикъалай-къуз хьурай вич мад авадан,

“Лезги газет” жедайвал гьардаз мугьман

“Лезги газет” кхьихь, дустар, куьн сагърай!­

 

Чаз багьа тир, чахъ авай са газет я,

Кхьин, кIелун гьар лезгидиз лезет я,

Адан тираж пара хьун зи мурад я,

За ийизвайди квез са дад-бидад я:

“Лезги газет” кхьихь, дустар, куьн сагърай!­

 

Зун, Рамазан, Рухун Алид хуьруьнви,

ЯхцIурни цIувад йис я газет гъиле зи.

Гьа и къайда лезги чIални хуьзва за,

Квез виридаз ихьтин эвер гузва за:

“Лезги газет” кхьихь, дустар, куьн сагърай!­

Рухун  Рамазан, ЦIийи Макьар