Республикадин са жерге СМИ-ри хабар гузвайвал, Дагъустанда, газ ишлемишунай пул тагуз, еке буржар хьанвайбурун кьадар гзаф я. Алай йисан апрелдин вацран юкьварилай гатIунна, ахьтинбур газдикай магьрум жеда.
“Газпром газораспределение Дагестан” компаниядин крар идара ийидай директор Ризван Гъазимегьамедован гафаралди, хъуьтIуьн вахтунда агьалияр чимивиликай магьрум тахьун патал буржар алайбурун газ атIунин жигьетдай кIвалахар кьиле тухузвач.
“Гзафбуру счетчикрин рекъемрин бинедаллаз газ ишлемишунай пул гузвач. Нетижада еке буржар арадал къвезва. 15-апрелдилай и месэладив кьетIидаказ эгечIда: еке буржар алайбурун газ атIуда. И дуьшуьшда анжах са жувакай бейкеф хьун дуьз я, гьикI лагьайтIа, ишлемишнавай газдин пул гун къанундалди тестикьарнавай кар я, маса рехъ авач”, — алава хъувуна Р.Гъазимегьамедова.
«Лезги газет»
