Дагъустандин образованидинни илимдин министерстводи хабар гузвайвал, алай йисан гатуз республикадин сагъламвал мягькемардай лагерра 13 агъзурдалай гзаф аялри ял яда. И макьсадриз республикадин бюджетдай 167 миллион манат чара ийида.

Чешмедин делилралди, аялар республикадин 20 лагерди кьабулда. Къенин юкъуз абурукай 18 ял ягъунин сезондиз тамамдиз гьазур хьанва.

Дагъустанда лагерар мадни ава. Мукьвара махсус комиссияди республикадин сергьятра 35 лагерда ахтармишунар кьиле тухвана. Нетижада малум хьайивал, абурун са пай къулай шартIар авачирвиляй аялар кьабулиз гьазур туш.

Гьа са вахтунда Дагъустандин 10 муниципалитетдин школайра анжах юкъуз ял ядай шартIар авай 68 лагер ава. Анра лагеррин къуллугъчийриз гьакъи — муниципалитетдин, аялриз гудай недай-хъвадай суьрсетдин такьатар РД-дин образованидинни илимдин министерстводи чара ийида.

Къейд ийин хьи, алай йисуз Дагъустандай тир 300 аялди Кабардино-Балкариядин санаторийра ял яда.

Чи мухбир