ТIугъвалдиз акси тир хатасузвилин серенжемрал амал авуналди, Мегьарамдхуьруьн районда лежберрини багъманчийри никIерани багълара хуьруьн майишатдин кIвалахар давамарзава, хабар гузва муниципалитетдин пресс-къуллугъди.
Арадал атанвай тIугъвалдин шартIара республикада экономикадин хиле, кьилди къачуртIа, хуьруьн майишатда кIвалахар акъвазарун лазим туширди РД-дин Кьил В.Васильевани са шумудра малумарнай. Алай вахтунда Мегьарамдхуьруьн райондин багъманчийрини бустанчийри графикдин бинедаллаз тарариз, ципицIлухриз дарманар язава.
“Умуд кутазвай бегьер арадал атун патал жуван багъдихъ, мулкунихъ гелкъуьнин, иесивал авунин муддатни дуьздаказ тайинарун чарасуз я”, — лугьузва багъманчийри.
ЦипицIрин кул-кусар зиянкаррикай ва азаррикай хуьн патал абурун танарал ва пешерал чIур хьунин гелер пайда хьун вилив хуьн герек туш — серенжемар виликамаз тешкилунихъ еке метлеб ава. Тежрибалу багъманчияр ципицIрин кул-кусрин хилер атIунив ва абуруз талукь маса кIвалахар кьилиз акъудунив мекьивилер алатайвалди, гатфарин эвел кьилера эгечIзава.
Мегьарамдхуьруьн районда алай вахтунда ципицIлухри 1959 гектардин майдан кьунва, а мулкарин 1900 гектарди бегьер гъизва, амайбур цIийиз кутунвай ципицIлухар я.
«Лезги газет»
