Медицинадин рекьяй илимдин хиле агалкьунар къазанмишзавай чи ватанэгьлийрин жергеяр гьар йисуз цIийи тIвараралди къалин жезва. Нубатдин шад хабар чав и мукьвара Москвадай агакьна: ери-бине Ахцегь райондин Чеперин хуьряй тир Фатима Насрединовна Селимовади В.И.Кулакован тIварунихъ галай акушерстводин ва гинекологиядин милли центрада агалкьунралди медицинадин илимрин кандидатвилин дережа къачун патал диссертация хвена.
Фатимадихъ алакьунар авайди гьеле мектебда кIелзамай йисара раиж хьана. 2007-йисуз рикIе чIехи къастар авай руша Дербент шегьердин 8-нумрадин юкьван мектеб къизилдин медалдалди акьалтIарна, И.М.Сеченован тIварунихъ галай Сад лагьай МГМУ-дик экечIна. Инагни Фатимади яру диплом ва къизилдин медаль къачуналди куьтягьна.
Алакьунар авай лезги руша кIелунар медицинадин илимрин доктор Г.М.Савельевадин илимдин регьбервилик кваз М.В.Ломоносован тIварунихъ галай МГУ-дин фундаментальный медицинадин факультетдин кафедрада давамарна. Вадралди имтигьанар вахкай жегьил духтурдиз “Акушерство ва гинекология” пешекарвиляй махсус сертификат гана.
Гуьгъуьнлай Фатима Селимова академик В.И.Кулакован тIварунихъ галай акушерстводин, гинекологиядин ва перинатологиядин рекьяй медицинадин илимрин ахтармишунрин милли центрада “Акушерство ва гинекология” пешедай аспирантурадиз гьахьна.
Аспирантурада кIелай йисара Фатимади хейлин литература кIелна, илимдин чешмеяр ахтармишна, вичин кIвалах вири патарихъай тамамди хьун патал чIехи зегьмет чIугуна. Ада кьиле тухвай илимдин ахтармишунрин нетижаяр ВАК-дин журналра, маса изданийра чапна. Аспирантурада кIелзавай йисара адан къелемдикай илимдин 6 макъала (вири Урусатдин илимдин махсус журналриз акъатна) хкатна, уьлкведин дережада аваз кьиле фейи конференцийра, маса мярекатра иштиракна. 6 конференциядал, гьа жигьетдай яз 2017-йисуз Испанияда кьиле фейи мярекатдалди, Фатима Селимовади вичин докладар кIелна.
Илимдал машгъул жезвай йисара жегьил пешекарди аялар тежезвай хизанриз медицинадин рекьяй куьмек гунин, диагностикадин къайдаяр чирна, дуьм-дуьз диагноз ва герек тир раб-дарман (сагъар хъувун) тайинарун патал ультразвуковой диагностикадин, илимдин нетижайриз къимет гузвай статистикадин методрай кьил акъудна. Са гафуналди, медицинадин илимрин доктор Светлана Григорьевна Перминовадин ва медицинадин илимрин кандидат Надежда Владимировна Козыринадин илимдин регьбервилик кваз диссертация кхьей пуд йисан къене ада вич алакьунар авай пешекар, илимдин кукIушрихъ ялзавай духтур тирди тестикьарна.
Диссертация хуьзвай чIавуз комиссиядик квай вири членри (22 кас) Фатима Селимовадин кIвалахдиз еке къимет гана ва ам медицинадин илимрин кандидатвилин дережадиз лайихлу тирди къейдна.
Мисал яз, Москвадин областдин акушерстводин ва гинекологиядин илимдинни ахтармишунрин институтдин репродуктологиядин отделенидин руководитель, профессор Ксения Краснопольскаяди Фатима Селимовадин илимдин ахтармишунар тамам кIвалах тирдакай лагьана. Адан кIвалахда аялар тежезвай хизанриз репродуктивный технологийрикай менфят къачуна куьмек гунин цIийи къайдайрикай кхьенва. Медицинадин илимрин доктор Александр Гзгзянани жегьил алимдин диссертациядин кIвалахдин тарифна.
Фатимадин рикIе гзаф къастар ава. Чи мурад абур вири кьилиз акъатун я. Илимдин кукIушрихъ физвай рекьевай кьегьал рушаз чна югъур хьурай лугьузва. Къуй ви уьмуьрдин рехъ са манийвални авачир шегьредиз элкъуьрай!
Агьмед Магьмудов
