Дуьньядин са шумуд уьлкведи Россиядиз талукь санкцияр кьабулуни хуьруьн майишатдин суьрсет гьасилзавайбурун вилик тайин везифаяр эцигнава. Абурни хуьруьн майишатдин метлеб авай мулкарикай тамамвилелди менфят къачуникай, чкайрал гьасилзавай бегьердин кьадар артухаруникай, жезмай кьван хуьруьн майишат вилик тухуникай ибарат я. СтIал Сулейманан райондин администрацияда кьиле фейи совещанидал муниципалитетдин кьиле авайбуру хуьруьн майишатдин карханайрин, КФХ-рин, арендаторрин виликни и жигьетдай тайин везифаяр эцигна.
Эхиримжи вахтара арадал атанвай гьалар райондин зегьметчийри чпини гьиссзава. Абуру вири къуватар алай йисан бегьердин мягькем бине кутунал желбнава. И кар къалурун патал чаз райондин хуьруьн майишатдин ва суьрсетдин управленидай гайи делилрал са тIимил гегьеншдиз акъвазиз кIанзава.
ЦIинин бегьер патал районда шазан зулухъай 853 гектарда техилар цана. Санлай къачурла, никIер хъсан гьалда ава. Алай йисуз районда 170 гектарда гатфарин къуьл, 100 гектардилай виниз майданра нехв цадай фикир ава.
Картуфдиз гьахълудаказ кьвед лагьай фу лугьузва. ЧIехи майданра картуфар цунал машгъул жезвай хуьруьн майишатдин карханаяр, фермервилинни лежбервилин майишатар районда авач. ЯтIани алай йисуз районда кьилдин ксарин куьмекчи майишатра ва арендаторрин участокра, санлай къачурла, саки 280 гектарда картуфар цун пландик кутунва. ЦIийи Макьарин, Эминхуьруьн ва Зардияндин зонайра агьалийри кIвалерихъ галай чилин участокра картуфар цаз эгечIнава. И кардив яваш-яваш маса хуьрерин агьалиярни эгечIзава. Мадни шадвал кутадай кар я: дагъдин участокра картуфар цаз кIанзавай, и кар патал чил гьазурнавай ксарни ава.
Пешекарри лугьузвайвал, райондин мулкар картуфар цуниз са артух ярашугъ туш, гьавиляй бегьерлувални агъузди я. ЯтIани инсанри чпин салара хизанрин игьтияжар патал картуфар цазва.
ГьакIни хуьрерин агьалийри чпин кIвалерихъ галай участокра, салара хсуси игьтияжар патал чичIекар, серкер, келемар, газарар, чугъундурар, афнияр цада. Икьван чIавалди агьалийри, санлай къачурла, 40 гектарда чичIекар ва серкер цанва.
Районда салан майваяр асул гьисабдай теплицайрин майишатра гьасилзава. Ида агьалияр йисан кьиляй-кьилиз таза помидорралди таъминардай мумкинвал гузва. Идалайни гъейри, салан майваяр ачух майданрани цада.
Эхиримжи йисара районда гатун халияр ва къарпузарни цазва, саларай абурун тарифдин бегьерарни вахчузва. Алай йисузни абур кьилдин ксарин ва арендаторрин участокра, санлай къачурла, 101 гектарда цада.
Районда малдарвални йисалай-суз виликди физва. И кардиз инвесторри райондин мулкунал малдарвилин чIехи комплексар кардик кутуни екедаказ куьмек гузва. Гьелбетда, малдарвал вилик тухун, маларин ва лапагрин кьадар артухарун патал абуруз бес кьадар алафни гьазурун лазим я. И кар фикирда кьуналди, районда алай йисуз 469 гектарда, векьин тумар цун планламишнава. “Горец” ООО-ди 59 гектарда са йисан ва 86 гектарда гзаф йисарин векьин тум цанва. 89 гектар вилик йисарин векьин уьруьшарни ава.
Алай йисуз райондин карханайри 556 гектарда багълар ва 110, 5 гектарда уьзуьмлухар кутунва.
Гатфарин чуьлдин кIвалахар кьиле тухунал машгъул хуьруьн майишатдин карханайрихъ, хуьрерин зегьметчийрихъ элкъвена, лугьуз кIанзава: квез къуватар хьурай, халкьдин суфра берекатлу ийизвайбур!
Хазран Кьасумов
