Манийриз — уьмуьр

Лезги музыкадин алемда­ адан манийрин ван тахьай кас бажагьат ава. Гьеле вичел чан аламаз, бажарагълу компо­зитордин тIвар вири рес­публи­­када машгьур хьана. Рагь­метдиз фена къад йиса­лай виниз вахт алат­нава­тIани, Гьасана­гъа Мур­са­лович Мурса­лова лезги­ мани хуш тир инсанрин рикIера къе­ни вичин лайихлу чка кьунва.

Композитордин тIвар, манияр вири халкьдиз сейли ятIани, адан уьмуьр­дин ва теснифунин рехъ са акьван малум туш. За и рекьикай куьруьдаказ суьгьбетда ва им бажарагълу композитор халкьдин рикIелай алат тавунвайди мад сеферда тестикьарун жеда.

Гьасанагъа Мурсалов 1935-йисан 1-июлдиз Ахцегьа лежбердин хизанда­ дидедиз хьана. Хайи хуьруьн 1-нумра­дин мектеб акьалтIарай 1954-йисалай­ 1957-йисал­ди гележегдин компози­тор­ди Совет­рин Армиядин жергейра къуллугъна­. Анай хтайдалай гуьгъуьниз Гьа­са­на­гъа Мурсалович Дагъустандин хуьруьн майишатдин институтдин зоотехни­ческий факультетдиз гьахьна. Гьа и чIа­валай композитор вичин теснифунин кIвалахдив гатIунна: Дагълар Абдуллаеван чIалариз кхьей адан «Комсомол» тIвар алай сад лагьай манидиз экуь дуьнья акуна.

1962-йисуз институт акьал­тIа­райда­­лай кьулухъ Гьасанагъа Мурсалова­ Ах­цегь райондин хуьруьн майишатдин­ зоотехниквиле, 1969-1972-йисара­ кьи­лин зоотехниквиле кIвалахна. 1972-йисалай­ ам райондин «ЦIийи дуьнья»­ газетдин­ редакцияда жур­налист­вилин­ кIва­ла­хал элячIзава. Ина, жергедин кор­рес­­пон­дентвилелай­ кьи­лин редакторви­лел кьван хкаж хьуналди, ада 1979-йисалди­ кIва­­­лахна. Бажараглу му­зы­­­кант­ди ва композиторди­ Ма­­хачкъа­ладин Готф­рид Гьа­са­­но­ван тIва­ру­­нихъ галай му­­зыкадин училищеда­ заоч­нидаказ кIел­на. 1979-1985-йиса­ра­ ада Ах­цегьрин­ музыкадин мектеб­дин ди­ректорвиле­ кIва­лах­на. 1985-йисуз Гь. Мурсалов мад район­дин газетдин редакциядиз хъфена ва ана редак­тордин заместителвиле, 1997-2001-йисара кьилин­ редакторвиле зегьмет чIуг­­вазва.

Бажарагълу компози­тор хьиз, Гьасанагъа Мур­салов 200-далай виниз манийрин авторни я. Абурун арадай чавай Шагь-Эмир Мурадован («Докъузпара», «Диде», «Буба»), Къияс Межидован («Цуькверин сувар», «Умуд»), Расул Гьамзатован («Баку»), Мегьамед Атабаеван («Москвадиз салам»), Алирза Саидован («Коммунистар», «Маяк­рин мани», «Маяк Саимат») ва гзаф маса шаиррин чIалариз кхьенвай манийрин тIварар кьаз жеда.

1989-йисуз ДАССР-дин Верховный Советдин Президиумдин Указдалди Гьасанагъа Мурсаловаз Дагъустандин искусствойрин лайихлу деятель лагьай виниз тир тIвар гана.

Гь. Мурсалов 2001-йисан 29-сентябрдиз, 66 йисан яшда аваз, рагьметдиз фена. Композитордин тIвар Ахцегьрин са куьчедиз ганва.

Эдуард  Ашурагъаев