Са чарчин гелеваз

И мукьвара зун Мегьарамдхуьруьн райондин Ярагъ-Къазмайрин хуьряй тир    2-группадин инвалид, 83 йис яш хьанвай гьуьрметлу агъсакъал Гьажибуба Рустамовалай редакциядиз атанвай ка­гъазда-арзада авай делилар ахтармишун патал чкадал фена. Чир хьайивал, “Лезги газетдин” редакциядиз рекье тунвай арза ада гьакlни Дагъустандин Кьил В.А.Васильеваз, РД-дин Халкьдин Соб­ранидин Председатель Х.И.Шихсаидоваз, РД-дин прокурор А.В.Ежоваз, РД-дин здравоохраненидин министр Ж.А. Гьажиибрагьимоваз, “Дагправда”, “Дагъустандин пенсионер” газетризни ракъурнавай.

Агъадихъ арза куьрелди гузва.

“Дарманралди таъминарун патал за са шумудра РД-дин здравоохраненидин министерстводиз кхьена, гьакlни министерстводин отделрин начальникар Л.Н.Кварацхелиядин ва З.Х.Мегьамедовадин патавни фена, амма къени агакьай куьмек авач.

Идалайни гъейри, алатай йисан 25-октябрдиз Республикадин кли­нический больницада хьайи чIавуз ганвай начагъвилин тарихдин выписка (№ 9303) гваз зун  Л.Н.Кварацхелиядин патав фейила, ам зи выпискадиз килигна, вири патарихъай куьмек гуда лагьа­на, гаф гана. Амма къени я дарманар, я игьтияжриз къуллугъ авун авач… 2018-йисан “Дагъустандин пенсионер” газетдин 5-нумрадиз акъа­тай “Пенсияр ва кьезилвилер” ма­къалада 80 йис тамам хьанвайбуруз  рецепт кхьена гайи  цlуд йикъан къене, ам гваз аптекадиз фейила, дар­манар 50% кьезилвилер аваз гуникай кхьенва.­

Духтурди кхьей рецептрай къачур дарманрин пулар начагъбурув ни элкъвена вахкана кlанзаватIа, малум туш…”

Гьажибуба Шихмурадовичахъ галаз чун хуьруьн администрациядиз фена.

Ана чун адав гвай  чарариз килигна.  ИкI, адав ИП-динди тир 41-нумрадин аптекадай 2019-йисан 26-апрелдиз, вичин жибиндай пул гана, 12 агъзур манатдин, гьа и аптекадай 2019-йисан 2-октябрдиз 12 агъзурни 220 манатдин дарманар къачунвайди тестикьарзавай чарар (накладные) гва.

— Я хва, гьукуматди хиве кьунвай, 80 йис яш хьанвайбуруз къачур дарманрай эвез ийизвай 50% кьезилвилер ни вахкана кlанзаватlа, садазни чизвач. Им за са зи патахъай чlуг­вазвай къайгъу туш, чи хуьре зи яшда авай ва залай чlехи­бурни 44 кас ава.

Ада зав яш хьанвайбурун тlварар авай  сиягь вугана. Дугъриданни, ана къалурнавайбурук 1920, 1924, 1926-йисара хайи ксарни, сан­лай 44 кас  яшлубур ква.

Инлай чун Гь.Рустамова арзада къалурнавай 1 ва 2-группадин инвалид аялар авай диде Разият Назирова яшамиш жезвай кlва­лиз фена.

Чун иниз къвезва лагьана ван хьайи­ла, кlвализ Разият Назировадин вахар атанвай. Абурун ихтилатрай малум хьайивал, Р.Назировадин 60 йис я. Ам пенсияда ава. Чпин кlвал тахьуниз килигна, абур кирида кьунвай кlвале яшамиш жезва. 2-группадин инвалид Мавлудин Агьмедован — 35 йис,  Мальвира Агьмедовадин — 31 йис,  ам 1-груп­па­дин инвалид я. Мальвирадивай къе­къвез жезвач. Ам гьамиша я месел же­да, я та­хьай­тlа ацукьна креслода. Адаз рахаз чизвач. Вичин са игьтияжни ­адавай кьилиз акъу­диз жезвач. Вуч ийиз хьайи­тlани, чlехи­дан куьмек герекзава.

Гадани саки гьакl я. Нервийринни психикадин азардикди начагъ тир ам гьамиша юзундик ква. Чун кIвале аваз хьайи вахтунда ам са легьзедани секиндиз акунач: кьил са патахъ, кlвачер са патахъ, гъилер са патахъ гьар сад вичиз кlани патахъ, гададилай аслу тушиз, юзунда ава.

Гьелелиг хизандиз чпивай жедай куьмекар вахари, мукьва-кьилийри ва мис­кlин­диз къвезвай гадайри гузва.

Газетдикай менфят къачуналди, чаз райондин ва республикадин талукь идарайривай кIеве авай и хизандиз фикир гун тIалабиз кIанзава.

Къагьриман  Ибрагьимов

Редакциядин  патай.

Яшлу касдин арзадин гелеваз “Лезги газетдин” яшайишдин ва чарарин отделдин редактор Р.Рамалданова Дагъустандин здравоохраненидин министерстводин дарманралди таъминардай (МНП и ДЛО) отделдин начальник Лаура Кварацхелиядин патав фена.

— Юлдаш Гьажибуба Шихмурадович чи отделдиз атайди я. Мегьарамдхуьруьн ЦРБ-да терапевтдин учётда авай адаз вич яшамиш жезвай чкадин поликлиникадиз фин меслятнавай. Амма и касди вич республикадин ветеранрин поликлиникадихъ галкIурун кIанзавайди раижна. Алай вахтунда ада и кар кьилиз акъуднавани, авачни заз чидач. Ина кар алай месэла масад я: Гь.Рустамова федеральный бюджетдай гузвай кьезилвилерай пул къачузва, яни иник акатзавай санаторийрани курортра сагъламвал мягькемаруникай ва дарманрикай отказнава. (Ахьтинбур лагьайтIа, Дагъустанда 92,4 процент ава). Региональный сиягьдик акатзавай дарманар лагьайтIа, адаз гузва. Чун азарлу гьар са касдин гьалдин гъавурда акьаз чалишмиш жезвайди я. Амма аптекайрай дарманар къачунвай чарар къалуруналди, чавай жедай куьмек авач. Идалайни гъейри, азарлудаз (эгер ада дарманрикай отказнавачтIа) БАД-ар, векьер-кьаларикай гьазурнавай дарманар къачуз кIан хьуналди, абур (гьам федеральный, гьамни региональный кьезилвилерик кваз) пулсуздаказ гузвайди туш. ГьикI хьи, чахъ кьа­булнавай законар ава, анра къалурнавайвал, пулсуздаказ гун лазим тирбурук анжах инсандин уьмуьр патал важиблу дарманар (ЖВЛП) акатзава. ИкI, федеральный сиягь кьилди я, региональный — кьилди. Гьажибуба Рустамова къалурнавай дарманрик инсандин уьмуьр патал важиблу дарманар хьиз, пулсузбурук акат тийизвайбурни ква, — лугьузва ада.

Арзада къалурнавай четин гьалда яшамиш жезвай хизандиз талукь яз Мегьа­рамдхуьруьн ЦРБ-дин кьилин духтур Гь.Беглерован гафаралди, М.Агьмедов (1-группадин инвалид) психиатрдин ва М.Агьмедова (2-группадин инвалид) неврологдин учётра ава. Кьведани федеральный кьезилвилерай пул къачузва. Региональный сиягьдик квай вири дарманар, гьакIни медицинадин рекьяй лазим вири куьмекар абуруз гузва.

Къейд. “Дагъустандин пенсионер” газетда чапнавайвал, 80 йисалай виниз яшара авай ксарив аптекайрай къачузвай дарманрай пулар вахкуниз талукь месэладай кьил акъудиз хьанач. Санани адакай хабар авач.

«Лезги газет»