28-августдиз Ахцегьа муаллимрин совещание, коронавирусдикай игьтият яз, видеоконференциядин (ВКС) къайдада кьиле фена. Ам, муаллимриз кIелунин цIийи йис тебрикуналди, Ахцегь муниципалитетдин регьбер О.М.Абдулкеримова ачухна ва кьилени тухвана. Конференциядин кIвалахда райондин образованидин управленидин начальник А.Гьажиева, образованидин идарайрин руководителри, къайдаяр хуьдай органрин, диде-бубайрин, общественный тешкилатрин векилри иштиракна.
Кьилин докладчик, РУО-дин начальник Алмас Гьажиеваз гаф гудалди вилик, райондин кьил Осман Магьмудович районда образование авай гьалдал ва адан ери хъсанарунин мумкинвилерал акъвазна.
Ада къейд авурвал, эхиримжи йисара образованидин ери хъсанаруниз ва школайра материалринни алатрин база мягькемаруниз еке фикир гузва. Кьилди къачуртIа, эхиримжи вахтунда “100 школа” проектдин сергьятра аваз райондин 7 школа къайдадиз хканва, “Точка роста” центраяр ачухнава, воркаут-майданар туькIуьрнава, аялар тухудай автобусрин парк цIийи хъувунва, учебникрин патахъай игьтияж алуднава, образованидин идарайра цIаяр кьуникай хатасуз авун патал сигнализация, гьакI видеокамераяр дуьзмишнава, мебель къачунва. Гъилевай йисуз “Хуьрерин мулкар комплекснидаказ вилик тухун” программадай 60 аялдиз чкаяр авай бахча, зурба спорткомплекс эцигзава. Чимивал хуьн патал 7 школада кIарас кудай пичер центральный отопленидин къурулушралди эвеззава ва икI мад.
РФ-дин Президентди Федеральный Собранидиз ракъурай Чарче къалурнавайвал, 2024-йисуз Россиядин образование дуьньяда лап хъсанбурун жергеда гьатун лазим я. И мураддив агакьарун патал къе образование Россияда кар алай хилерикай сад яз малумарнава. “Гьар садаз — ерилу чирвилер!” — важиблу и эверуник кваз къуватар желбна кIанзава. Хизанда, школайрани бахчайра аялриз ерилу чирвилерни ватанпересвилин тербия гунин кIвалах, тарсара информациядин цIийи технологияр ишлемишиз тунин къайдаяр гуьзчивилик кутунва. Пара крар аялрин чирвилерин бине эцигзавай сифтегьан классрин муаллимрилай аслу я, гьавиляй абуруз бегьерлувилелди кIвалахдай шартIар яратмишун ва истемишунарни артухарун важиблу я.
Аквазвайвал, эхиримжи йисара 10-классра аялрин кьадар тIимил жезва. ЕГЭ-дикай кьил къакъудун яз, абуру ссузра пешекарвилин юкьван чирвилер къачузва. Эхиримжи 3 йисан вахтунда санлай 148 аял хкатнава ва 6 класс-комплект тIимил хьанва. Ида вини дережадин пешекаррин кьитвилел, муаллимриз кIвалах тIимил хьунал гъизва. КIелунин цIийи йисалай образованидин управление ва методцентр выпускникар ОГЭ ва ЕГЭ вахкуниз гьазурунив гьа сифте йикъалай еке жавабдарвал гьиссуналди эгечIна кIанда.
Школаяр кIелунин цIийи йисаз гьазурун патал райадминистрацияди еке кIвалах тухвана: вахтунда ремонтрин пулар чара авуна, эпидгьалар фикирда кьуналди, махсуc термометрияр, медмаскаяр, дезинфекциядин шейэр гана. Аялринни муаллимрин сагъламвал хуьн патал чна гележегдани алакьдай вири жуьредин куьмекар ийида…
Докладдин винел “Школайра девирдин истемишунрив кьур шартIар яратмишун” темадай Къурукаларин СОШ-дин директор Гьайдар Эльдаров, “Алава образование аялрин чирвилерни алакьунар артухарунин важиблу пай я” темадай юннатрин станциядин директор Мадлена Гьажиева, “Школадилай виликан образованидин ери — им аялдин уьмуьрдин ери я” темадай КьакIарин хуьруьн аялрин “Орлёнок” бахчадин заведующий Диана Магьсубова, “Люминариди — школайриз, аялризни муаллимриз цIийи мумкинвилер” темадай Хуьруьгавай “Люминари” проектдин руководитель Дмитрий Корюхин ва масабур рахана. ВКС-дин къайдадин мярекат нетижаяр кьуналди ва районда образованидин къурулуш вилик тухунин гьакъиндай махсус къарар кьабулуналди бегьемарна.
Дашдемир Шерифалиев
