Россиядин гьавадин дяведин кьушунри­ махсус серенжемда гъалибвилерик кутазвай пай лап екеди я. Абуру гьа сифте йикъа­рилай миллетчийрин кьушунрин кар алай чкаяр ракетайрай язава, военный объект­рал бомбаяр вегьезва, душмандин мягькем­ пунктар барбатIзава. Къенин йикъалди гьавадин кьушунри лап важиблу метлеб авай гзаф кьадар операцияр кьиле тухванва.  Мисал яз, абуру 2022-йисан 24-февралдиз­ — Одессадин патав гвай военный карханаяр­, 13-мартдиз — Яварда авай Украинадин ин­тер­­национальный легионеррин центр, 18-март­диз — Делятин шегьердин чилин кIаник­­­ квай яракьар авай склад, 10-октябрдиз — Украина­дин энергетикадин къурулушар яна. 2023-йисан 14-январдиз энергетикадин объектрал мад гьужумна…

Летчикрин дестейри гьар юкъуз цавуз чпин «ракьун къушар» акъудзава ва чи кьушунриз виликди физ манийвалзавай душмандин сенгерар, мягькем пунктар, дзотар, танкар, артиллериядин батальонар бар­батI­зава. Абур ракетайрайни язава, миллетчийрин винел бомбаяр, минаярни вегьезва.

Тарихдиз вил вегьейтIани, гьавадин дя­ведин къуватрихъ баркаллу ва игитвилин­ чешнеяр ава. Виш йисалай гзаф вахтунда Россиядин авиация лап къуватлу, гьар са кар алакьдай хилез элкъвена. Дуьньядин сад лагьай, Ватандин ЧIехи дявейрани Советрин, Россиядин летчикри чпин викIегьвал, алакьунар, жуьрэтлувал къалурна, четин тапшуругъар намуслувилелди кьилиз акъудна­. Уьл­кведин гьавадин къуватрихъ галаз ала­къалу хилерин къуллугъчийрини (конст­рук­торар, инженерар, техникар, фялеяр…) авиациядиз чпин бажарагъ, зегьмет, устадвал бахшна. Лап хъсанбурун тIварар неинки уьл­кведа, гьакI дуьньядани машгьур хьана.

Алай вахтундани гьавадин дяведин къурулушра къуллугъзавайбуру чIехи несилдин баркаллу адетар лайихлувилелди давамарзава. Абуру государстводин хатасузвал, аслу туширвал таъминарун, душманрин къурхуйрикай хуьн патал цIийи техника ахтармишзава, чпин устадвал хкажзава.

Чавай къе инанмишвилелди лугьуз жеда хьи, Россиядин цав жуьрэтлу, пешедин рекьяй устад ксари дикъетдивди хуьзва. Гьавадин къуватар, са рахунни алачиз, Россиядин Яракьлу Къуватрин лап хъсан хел ва уьлкведин армиядин дамах я. Гьавиляй абур мадни къуватлубур, кар алайбур, лап четин тапшуругъар, везифаяр кьилиз акъу­диз жедайбур авун патал датIана цIийи-цIийи техникадалди таъминарзава.

МасакIа хьана виже къведач. Дуьньяда агъавализ алахънавай США-дин цIийи президент Дональд Трамп авторитет квахьзавай ва доллардин дережа агъуз аватзавай вахтунда зурбади тир державадин лайихлувал чкадал хкиз алахънава. Сифте нубатда — Россиядин гужлувал агъузариз алахъу­налди. И кар патал гьам ачухдиз, гьам чинеба вири жуьредин рекьер ишлемишзава. Ингье и йикъара Россиядивай нафт, газ къачузвай Китайдал, Индиядал алава­ пошлинаяр илитIда лугьуз малумарзава. ГьакI — маса уьлквейрални. Россиядин экономика барбатIна, ам метIерал акъвазариз кIанзава. Гьа са вахтунда Россия элкъуьрна военный базайрин, лап яргъал фидай ракетайрин юкьва твазва. Гьатта, вичиз кIандайвал тахьайтIа, Москвадал бомбаярни вегьеда лугьуз, журналистрин вилик малумарзава Трампа.

Ихьтин вахтунда Россия вичин Яракьлу­ Къуватрин къудрат мадни мягькемаруниз мажбур жезва. ГьакI — дяведин гьавадин­ къуватарни. ИкI, къенин йикъара уьлкведин­ авиа­ция алай аямдин «воздух-воздух», «воз­дух-поверхность» классдин идара ийиз­ жедай вини дережадин ракетайралди таъ­минарнава. Абур дяведин махсус серенжем­дани ишлемишзава. ГьакI, гьавада ишлемишзавай лувар квай ва дуьм-дуьз тайин­ чка язавай ракетаярни майдандиз акъуд­нава.

Къе, малум тирвал, Россиядин гьавадин къуватрин летчикри Су-35С, Су-30СМ, Су-34 самолетра, Ка-52, Ми-28Н, Ми-8 маркадин вертолетра аваз миллетчийриз гзаф зиянар гузва. Чи кьушунриз виликди гьужумдай мумкинвилер яратмишзава. Самолетар ва вертолетар алай аямдин технологийриз, истемишунриз жаваб гузвайбур я. Абурухъ, чпиз зиян тагана, душмандин сенгерар барбатIдай, техника, кьушунар тергдай мумкинвилер ава. Чи летчикри абурукай кардин гъавурда аваз менфят къачузва.         Россиядин Президент Владимир Путина и мукьвара лагьайвал,  США-дин ва коллективный западдин къурхуйриз жаваб гуз чун гьамиша гьазур я. Россиядин итижар хуьн патал чахъ вири жуьредин такьатар ва мумкинвилер ава.

Гьавадин флот штурмовой, истреби­тель­но-бомбардировочный жуьредин самолетралди, истребителралди таъмин я. Абурухъ ядерный бомбаяр тухудай мумкинвални ава. Авиацияди гьавадин къуватрин вилик акъвазнавай вири месэлаяр­ гьялзава: гьавадин разведкадин вири жуьреяр,­ кьушунар хуьзва, абуруз гьавадай куьмек­ гузва, десантар, разведкадин дестеяр лазим­ чкайриз агакьарзава ва абур лазим чIавуз вахчузва, кьушунар ва техника чкадал агакьарзава, самолетрин экипа­жар къутармиш­зава, хер хьанвайбурун гьакъиндай къайгъу чIугвазва… Алай вахтунда гьавадин такьатри кьилиз акъудна кIанзавай крар мадни артух хьанва. Исятда женгинин (боевой) де­журство кьиле тухузвай радиотехнический, зенитринни ракетрин ва истребительный авиациядин частари, подраз­деленийри Россиядин Федерациядин гьавадин бушлухрин хатасузвал хуьзва. Гьа са вахтунда­ РФ-дин Президент, Верховный главнокомандующий Владимир Путинан къарардалди дальний авиациядин самолетри дуьньядин лап яргъал тир майданарни гуьзчивилик кутунва ва мукьвал-мукьвал цава лув гузва.

Чи уьлкведин ва гьакI дуьньядин майданда ислягьвал хуьн, дяведик цIай кутаз кIанзавай уьлквейрин иштагьар квадарун ва дявекарриз дуьзгуьн жаваб гун патал лазим кьадарда алай аямдин техникани герек жезва. Къенин юкъуз гьавадинни космосдин къуватар лазим кьадарда самолетралди, вертолетралди, пешекарралди таъмин я.

Къейд авун лазим я хьи, Россиядин гьавадин дяведин къуватра дагъустанвийри, гьа гьисабдай яз лезги халкьдин векилрини уьтквемдиз, жуьрэтлувилелди къуллугъзава. Абурукай «Лезги газетдини» кхьизва. Уьл­кведин гзаф миллетрикай ибарат кьушунра къуллугъзавай дагъвийри Украинадин миллетчийрикай Донбассдин чилер, шегьерар, хуьрер азад авунин баркаллу кар давамарзава ва гъалибвилерин сан артухарзава. Чна къе гьавадин къуватрихъ галаз­ алакъалу виридаз пешекарвилин сувар мубаракзава. Ватандин къаравулда акъвазнавай абурухъ сагъламвал, агалкьунар хьурай! Чи кьегьалар махсус серенжемдай сагъдаказ, гъалибвал гваз чпин кIвалериз хтурай!

Нариман Ибрагьимов