Хатасузвал патал
Гьавада газ пайда хьунал гуьзчивал тухудай датчикри газ акъатзавай дуьшуьшдикай вахтундамаз хабардардай ва чIуру нетижаяр арадал атуникай хуьдай мумкинвал гуда. Идакай «Дагъустан патал газ» телеграм-каналди кхьизва.
Къейдзавайвал, кIвалин кухня ихьтин такьатдалди таъминаруниз гзаф кьадар харжияр акъатзавач, ам эцигун патал артух вахтни герек жезвач. Ам газдин плитадин мукьув чилелай кьве метрдин кьакьанда эцигзавай са акьван еке тушир шей я.
Ахтармишдай такьатди (анализатор), гьавадик газ квайди тайин хьайила, лап къатидаказ сес акъудиз башламишда, гьатта ван къуншийривни агакьдайвал. Ихьтин дуьшуьшда тади гьалда газдин кран (вентиль) агална кIанда, гьакIни «аварийный», ва я «экстренный» къуллугъриз зенгда: 104 ва я 112-нумрайриз.
Телеграм-каналдин делилралди, уьлкведа ихьтин сигналдин такьатар (сигнализаторар) акъудзавай карханаяр са шумуд ава: Rubetek, «Премьер Групп», «ПКФ «Энергосистемы», «НПФ «Полисервис», «ГазоАналит».
ТIимил хьанва
РД-дин здравоохраненидин министерстводин телеграм-каналди раижзавай къейдерай гъавурда акьазвайвал, республикада 2025-йисан 6 вацра, виликан йисан и муддатдив гекъигайла, аялар кьиникь 46-дан тIимил хьанва.
РД-дин здравоохраненидин министр Ярослав Глазован гафаралди (алатай йисав гекъигайла), 50-дав агакьна къутармишнавай бицIекар — ибур гьакIан рекъемар туш, им Дагъустандин медицинадин цIийи мумкинвал я. ЦIи Махачкъалада ва Хасавюртда перинатальный центраяр тамамвилелди тадаракламишнава.
Дагъустанда, алатай йисара хьиз, гзаф аялар хун давам жезва. ИкI, 2025-йисан 6 вацра 21 385 аял хьанва. 2024-йисав гекъигайла, им 229 аялдин гзаф я.
РикIел хкин, виликдай гьа и чешмеди хабар гайивал, алай йисан сад лагьай паюна ханвай 21 385 чагъадикай 10 592 — гадаяр, 10 793 рушар я. Абурукай кьветхверар — 186. Пуд дуьшуьшда пуд аял санал хьана.
КIвалах давамарда
Алай йисуз Дагъустанда, «Давамлу ва активный уьмуьр» милли проектдин сергьятра аваз, медицинадин 121 объект эцигунин ва капитальнидаказ ремонт авунин кIвалахар кьиле тухуда. РД-дин здравоохраненидин министр Ярослав Глазова къейдзавайвал, хуьрера цIийи 45 ФАП ва духтуррин амбулаторияр, 76-дав агакьна капитальнидаказ ремонтнавай медицинадин идараяр ва отделенияр хьун — им дагъустанвийриз медицинадин куьмек гъил агакьдайди авун хейлин артухарун я.
Гьазурайди — Муса Агьмедов
