Алай йисуз Мегьарамдхуьруьн райондин мектебра 7100 школьник партайрихъ ацукьда. Абурукай 735 аял сад лагьай классдиз къведа.­

— Гьамиша хьиз, алай йисузни райондин администрацияди школаяр цIийи кIелунин йисаз гьазурунин кардиз артух фикир гана, — лугьузва образованидин управленидин начальник Улубег Абейдуллаева, — школаяр гьар йисан куьлуь ва капитальный ремонт авун, герек тадаракар къачун, куьгьнебур цIий­ибу­рал­ди эвез авун райондин кьил Фарид Агьмедован гуьзчивилик кваз хьана. Ада чаз герек вири куьмекар гана. Нетижада чи вири мектебар цIийи кIелунин йисаз вахтунда гьазуриз алакьна.

Республикадин “Школайрин образованидин къурулушар цIийи хъувун” проектдик кваз Мегьарамдхуьруьн М. Гьажиеван тIварунихъ галай СОШ, Гилийрин ва Филерин юкьван школаяр, саки 46 миллион манат серфна, капитальный ремонт авуна куьтягьна. Анра ракIарар, дакIарар, полар дегишарна, къавар цIийи хъувуна, сувагъар яна ва маса кIвалахар авуна. Пуд школани цIийи мебелдалди, компьютеррин техникадалди тадаракламишзава. Куьрелди, и мектебар тамамвилелди цIийикIа туькIуьр хъувуна. Аялриз чирвилер къачудай, муллимриз кIвалахдай алай аямдин къулай шартIар яратмишнава.

Вири школайра 1-4-классра кIелза­вай­­бу­руз чими хуьрекар гудай пищеблокар ремонт­на. Са жерге пищеблокриз цIийи къаб-къажах, тадаракар, гьа гьисабдай яз холодильникар, мебель къачунва. Гуьгьуьлар мад­ни хкаждай­ вакъи­адикай: 1-сентябрдиз Уружбадал 304 чка авай школадин цIийи дарамат шад гьалара ачухда.

— 2022-2023-кIелунин йис чи райондин пе­дагогриз а кардалди къейд ийиз кIанзава хьи, школайра ватанпересвилин тербиядиз кье­тIен фикир гуда, — лугьузва Улубег Абейдуллаева. — Им алай девирдин истемишун я. Чи Ватандал — Россиядал кьуд патахъай ин­фор­мация­дин гьужумар ийизвай душманрин хура акъвазиз, абуруз кьулухъди рум хгуз аял чIа­валай чирна кIанзава. “Ватандин ЧIехи дяве­да гъа­либ­вал къазанмишайди советрин муаллим, советрин школа я” — ибур субут хьан­вай­ гьахълу гафар, гьахълу фикир я. Абур чна гьамиша ри-кIел хвена, советрин школада хьайи хъсан къайдайрикай, хъсан тежрибадикай менфят къачуна кIанда.

Гьакъикъатдани гьакI я: советрин шко­ла­ди­ гьазурай аскеррилай, армиядилай дуьньяда а вахтунда виридалайни гужлуди хьайи чап­хунчи фашистрин а­р­мия­дин винел гъалибвал къазанмишиз алакь­на. Гъалибвилерин чешме школа я.

Абдулафис Исмаилов