Образованидин къуллугъчийрин гегьенш совещание Кьурагь районда 25-августдиз кьиле фена. Муниципалитетдин регьбер Замир Азизова вири иштиракчийриз, образованидин хиле кIвалахзавайбуруз кIелунин цIийи йис тебрик авурдалай кьулухъ сифте гаф райондин образованидин отделдин начальник Махач Хариеваз гана. Ада “Кьурагь райондин образование: нетижалувал, ачухвал, ерилувал” темадай гегьенш доклад авуна.
Ада малумарайвал, алай йис РД-дин Кьил Сергей Меликова республикада образованидинди яз малумарайдалай кьулухъ Кьурагь районда и йис къейд авуниз талукь яз махсус къарар акъудна. Адал асаслу яз, са жерге мярекатар, серенжемар кьиле тухвана. Кьилди къачуртIа, “Йисан муаллим — 2022”, “Йисан тербиячи”, “Хайи чIалан лап хъсан муаллим”, “Чан алай классика”, “Хайи чIалан эсерар лап хъсандиз кIелдайди” конкурсар метлеблубур хьана.
“Йисан муаллим — 2022” конкурсда райондин 16 муаллимдин арада сад лагьай чка Кьурагьрин 1-нумрадин школадин урус чIаланни литературадин муаллим Ирада Урдихановади кьуна. Конкурсдин зонадин паюна ам 2-чкадиз лайихлу хьана”, — лагьана М.Хариева.
Райондин образованидин отделдин начальникди муькуь конкурсар кьиле фейивиликайни, муаллимрихъ хьайи агалкьунрикайни галай-галайвал ихтилатна.
Образованидин месэлайрикай, чирвилер гунин карда бязи нукьсанрикай, абур гьялдай рекьерикай са жерге муаллимри веревирдер авуна, чпин фикирар лагьана.
Образованидин хиле агалкьунар къазанмишунай, гьакъисагъвилелди зегьмет чIугунай КIирийрин мектебдин муаллим Сабина Абдуллаевадиз, Хпуькьрин мектебдин муаллим Исамудин Агьмедоваз, Шимихуьруьн мектебдин муаллим Рейгьан Гьажимурадовадиз, Кьурагь райондин 2-нумрадин мектебдин муаллим Лаида Къадировадиз, Араблярдин мектебдин директордин заместитель Шарафудин Къазихановаз “РФ-дин просвещенидин ва тербиядин гьуьрметлу къуллугъчи” лишан гана. Са жерге къуллугъчийрив, алай йисуз ЕГЭ кьиле фейила, везифаяр гьакъисагъвилелди кьилиз акъудунай райондин кьилин патай гьуьрметдин грамотаяр вахкана.
Чи мухбир
