Татарстан Республикадин меркез Казанда кьиле фейи Вирироссиядин «Коррекциядин мектебда футбол» турнирдин финалда Мегьарамдхуьруьн «Республикадин махсус (коррекциядин) VIII жуьредин школа-интернатдин» гадайрин команда гъалиб хьана.
Россиядин футболдин союзди хабар гузвайвал, мини-футболдай акъажунар ина 30-майдилай 1-июндалди «Олимпиец» ва «Триумф» спорткомплексра кьиле фена. Мугьманрин арада Татарстандин спортдин рекьяй министрдин заместитель Ильдар Садриев, Казандин исполкомдин руководителдин заместитель Гуьзел Сагитова, РТ-дин образованидин ва илимдин министерстводин управленидин начальник Татьяна Алексеева, Россиядин просвещенидин министерстводин векил Екатерина Александрова, Вирироссиядин интеллектдин жигьетдай чIуру патахъ дегишвал авай ксар патал спортдин федерациядин президент Сергей Евсеев, «Рубин» ФК-дин гендиректор Александр Айбатов ва са жерге маса пешекарар авай.
2025-йисуз акъажунар кьве паюникай ибарат тир: региондин (хкядай) ва вирироссиядин (эхиримжи). Санлай къачурла, Казанда кьиле фейи эхиримжи паюна Россиядин 23 региондай тир 38 командади иштиракна: 22 команда — гадайринбур, 15 команда рушаринбур тир. Мадни ина Узбекистандай атанвай аялрин са коллективди иштиракна. Гадайрин команда 8 касдикай ибарат тир. ИкI, гадайрин командайрин арада Мегьарамдхуьруьн махсус школа-интернатдин аялри гъалибвал къазанмишна.
Инал къейдна кIанда хьи, кIвенкIвечи чкаяр кьурбурун арада неинки Дагъустандай, гьакI Кеферпатан Кавказдин маса са региондайни командаяр мад авач. И жигьетдай чна аялриз, командадин регьбер Р.К. Шайдабеговаз, школа-интернатдин директор А.К. Рагьимхановаз, санлай мектебдин вири коллективдиз агалкьун мубаракзава!
РикIел хкин, Россиядин футболдин союзди, Вирироссиядин интеллектдин жигьетдай чIуру патахъ дегишвал авай ксар патал спортдин федерацияди РФ-дин просвещенидин ва спортдин министерствойрихъ галаз санал арадал гъанвай «Коррекциядин школада футбол» проект 2023-йисалай кардик ква.
«Чи проектдин важиблувал анжах спортдин рекьяй виликди финикай ибарат туш. Ада жемиятдиз набутвал, сагъламвилин жигьетдай нукьсанар авай аялрин месэлайрал виридан фикир желб ийиз куьмек ва, кьилинди, гьар са аялдиз вичин бажарагъ ачухдай ва виниз тир нетижайрив агакьардай мумкинвал гузва. Аквазвайвал, вахт-вахтунда къачузвай терапиядин, яни сагъламвал мягькемарунин жигьетдай вердишвилери ва акъажунра иштиракуни неинки аялрин беден мягькемарзава, гьакI, дугъриданни, абур халисандаказ футбол къугъваз башламишзава», — къейдзава тешкилатчийри.
Жасмина Саидова
