Россиядин просвещенидин министерстводи уьлкведин юкьван образованидин мектебрин 6-8-классра чирвилер гунин программадай обществознанидин тарс акъуднава. И дегишвал 2025-йисан 1-сентябрдилай къуватда гьатда. РД-дин образованидин ва илимдин министерстводин умуми образование вилик тухунин управленидин начальник Аймисей Акаевади федеральный идаради кьабулнавай къарардиз талукь яз баянар гана.
Ада гъавурда турвал, туькIуьрнавай законопроектдин бинедаллаз, 2025-йисалай обществознанидин тарс 6 ва 7-классрин программадикай хкудда, 2026-йисалай — 8-классдин. И тарс анжах 9-11-классра чирвилер гунин планрик кумукьда. Къарардин асул макьсад тарих чируниз чара ийизвай сятерин (тарсарин) кьадар гзафарун я.
Образованидин цIийи программайрал яваш-явашдиз, кьве йисан (2025-2026) вахтунда элячIда. Гьа са вахтунда, А.Акаевади къейд авурвал, школайра кIелзавай аялрал акьалтзавай пар заланардач, ОГЭ вахкунихъ галаз алакъалу четинвилерни, имтигьанар цIийи хъувунвай курсунихъ галаз кьадайвал туькIуьруналди, жезмай кьван тIимиларда. Хабар гузвайвал, чирвилер гунин цIийи къайда тежрибадиз гзаф фикир гудайвал туькIуьрда.
6-8-классра обществознанидин тарсар къуватдай вегьин адахъ галаз алакъалу я хьи, пешекарри материал чирвилерин и дережада авай аялриз тамамдаказ кьатIуз четинди, муракабди яз гьисабзава. Идалай вилик обществознанидин тарсар анжах чIехи классра гузвайди тир.
Дегишвилерин сергьятра аваз, гьакIни обществознанидай ктабар, Россиядин ивирар ва жемиятдин игьтияжар фикирда кьуна, цIийикIа туькIуьр хъийидайвал я. Планрик 9-11-классар патал государстводин сад тир учебникар туькIуьрунин месэлани ква.
Акаевади кьетIендаказ къейд авурвал, обществознание 6-8-клас- срин программадикай хкудуни образование гунин еридиз таъсирдач. Программадин пай я тарихдин, я тахьайтIа чIехи классрин тарсарик кухтада.
Саида Мурадова
