Уьмуьр санал акъвазнавач, ада датIана виликди гьерекатзава. Эгер Россиядин тарихдиз вил вегьейтIа, ам халкьдин майишатдин саки вири хилера (экономика, культура, спорт, дяведин женгер…) гъалибвилерихъ галаз алакъалу я. Эхь, къе вири алемни чIалахъ жеда: гъалибчи хьун чун патал баркаллу адет я. Ам чи халкьдин агалкьунрик вичин зегьметдин, алакьунрин пай кутазвай гьар сада арадал гъизва.
Дагъустанда меценатвал хванахвавилиз барабар ери, адет я. Карчийри дяведин махсус серенжемда авайбуруз мергьяматлувилин куьмек гузва. И карни вичин тIвар машгьурун патал садра ийизвач, тIвар раиж тийиз, датIана куьмекзава. Ихьтин ксар, гьатта хизанарни сад-кьвед туш, абур цIудралди ава. Гьа ихьтин жумарт, къени, Россиядин, Дагъустандин тарихда жанлу, чешнелу гел тазвайбурук чи баркаллу ватанэгьли, «Лезги газетдин» амадаг, даях Мамед Абасовни акатзава.
Чаз чизвайвал, меценатдин берекатлу гъил Ватандин ЧIехи дяведин ветеранрив, жемиятдин векилрив, жегьилрив, спортсменрив агакьзава. Гила СВО-дин аскерриз, абурун хизанризни куьмекзава. Игьтияж авайбуруз гьакъикъи даях хьун Абасован руьгьдин конституция я. Имни адан ивидик бинедилай, диде-бубадин тербия себеб яз акатнава.
КIеве авай инсан акурла, адалай къерехдилай килигиз акъвазиз алакьдач. Куьмек герекзавайдан патав акъатда. СВО-дин аскерар адавай яргъа аватIани, абуру четин шартIара женгинин везифаяр тамамарзаватIани, руьгьдай Абасов датIана абурухъ гала. Аскеррин хизанрин къайгъударвал авун ада вичин намусдин буржи яз гьисабзава.
Са акьван вахт алатнавач, «ЮТТ Виадук» ООО-дин регьберар тир Мамед Абасова ва Садула Мукаилова Каспийскдин больницадиз 10 млн. манатдин алай аямдин аппаратар багъишна. Эхиримжи кьве йисуз СВО-дин аскерриз 40 млн. манатдин шейэр рекье туна.
Сиясатдин, жемиятдин деятелди жегьилрин месэлаярни вичиз талукьбур яз гьисабзава. РД-дин жегьилрин союздин советдин председатель яз, Абасова Мегьарамдхуьруьн райондин Приморскда Кьиблепатан Дагъустандин студентрин III слет кьиле тухвана. Кьве юкъуз Дербентдин ва Дагъустандин Огни шегьеррин студентри жуьреба-жуьре программайрай чирвилер къачуна ва чпин алакьунар къалурна.
Мамед Абасова гьисабзавайвал, агьалийрив уьлкведа, республикада кьиле физвай вакъиайрикай гьакъикъи хабарар агакьун герек я. Гьавиляй ада Мегьарамдхуьруьн ва СтIал Сулейманан районриз «Лезги газет», «Дагестанская правда» газетар кхьизва. Ихьтин хъсан кардай Дагъустандин ветеранрин советдин председатель Магьарам Алижанова адаз сагърай лагьана.
Меценат инанмиш я хьи, эгер школайра образованидин вири компонентар уьмуьрдиз кечирмишайтIа, виниз тир чирвилер, культура авай несилар тербияламишиз жеда. Гьеле республикадин вири школаяр ахьтин дережадив агакьнавач. Гзафбуруз куьмек кIанзава, гьа гьисабдай яз хайи хуьруьн школадизни — Мамед Абасова 2 млн. манат гана.
Хъсан крарихъ майил авай, къвалав гвай, кIеве гьатнавай ксарин гьакъиндай къайгъу чIугвадай инсанар гьамиша авайди я. ГьикI лагьайтIа, абурув гъвечIи чIавалай гьахьтин тербия агакьна. Аллагь-Тааладини абуруз виридаз куьмекдай мумкинвилер гузва. И кар абурун уьмуьрдин буржидиз, везифадиз элкъвезва.
И йикъара Мамед Магьарамовича вичин хайи югъ къейдна. Чна адаз лишанлу югъ рикIин сидкьидай тебрикзава.
Гьуьрметлу Мамед Магьарамович! Вун чизвай, валай пара рази тир вирибурун тIварцIихъай ваз сагърай лугьуз кIанзава. Вуна чи республика, уьлкве патал пара хъсан крар ийизва. Вахъ абурун кьадар мадни артухардай сагъвал, къуватар, такьатар хьурай!
Абад Азадов
