Куьн хьаначиртIа, чун жедачир,
Квез гьакъикъат мус жеда чир!
Гьикьван тарих ийида чал?
Зирзибилар гадариз чал!
Сир туш, тарихдин гьакъикъатдиз дуьз къимет гунин карда акьалтзавай несилди иллаки кьетIен роль къугъвазва. Ватан маса гайи ахлакьсузрин виждансузвал себеб яз, СССР чукIуникди арадал атай базардин шартIарини акьалтзавай несилдин мефтIеда пис терефрихъ ян гуз тазва. Садазни, чилел зегьмет чIугуна, суьрсет гьасил хъийиз кIанзамач. КIвале фу чразмач, мал хуьзмач. Багълар, яйлахар, никIер баябанлухриз элкъвенва. Рекьерив алверзавайбуруни маса гузвайди гьа са затIар я. Ида адавай къачуз санал, адани идавай къахчуз, масанал хгузва. Вири затIарни гзаф вахтара еридин жигьетдай лап агъа дережадин усалбур жезва. Гьавиляй мукьвал-мукьвал алатай вахтар, Советрин девир рикIел хквезва. А йисара халкь пакадин йикъахъ умудлувал аваз яшамиш жезвай. Тек са Ватандин ЧIехи дяве рикIел хкун бес я. Жегьил, эгьли-вири Ватан патал кIвачел къарагъна. Гила лагьайтIа, СССР-ни чхкIана, социализмни коммунизм махариз хъфена, бязи мурадарни зай хьана…
Амма уьмуьр давам, цIийи несил чIехи жезва. Абурун гележег экуьди хьун патал диде-бубайри зегьметар чIугвазва. И вири крара руьгь хуьдай бажарагълу инсанрин зегьмет иллаки кьетIенди ва важиблуди хьун герек я. Уьмуьр давам хьунихъ галаз тарихдин ктаб яцIу, руьгьдин кукIушарни кьакьан жезва.
Гьуьрметлу жегьилар, куьн, бубайрин весийриз вафалубур яз, гьакъикъатдиз дуьз къимет гудайбур яз чIехи хьунал чи вил ала! Чи умудар квек ква! Чи Ватандин гележег куьне адан тарихдиз гузвай къиметдилай аслу жедайди рикIел хуьх! Лацудаз-лацуди, чIулавдаз чIулавди лугьунихъ важиблу метлеб авайди чир хьухь! Бубайрин адетар хуьх! Абурун тIварариз, крариз, насигьатриз вафалу хьухь!
Лга Энвер
