Алай вахтунда Дербентда Дагъустандин писателрин Союздин 85 йисаз бахшнавай мярекатар башламиш хьанва. И мукьвара шегьердин администрацияда анин кьил Хизри Мегьамедович Абакарованни чкадин шаиррин гегьенш гуьруьш кьиле фена. Ана авур рахунра писателар тир Кичибег Мусаева, Сардар Абила, и цIарарин авторди, Гуьлбике Омаровади (табасаранрин шаир), Тагьир Салегьа, Тегьмираз Имамова (азербайжанрин шаирар), Пейсах Мишиева (татрин шаир) ва яратмишдай интеллигенциядин са жерге маса векилри чпин яратмишунрин рекьерикай суьгьбетна, игьтияжрикайни лагьана. Кьилди къачуртIа, Дербентда шииратдин кIвал кардик кутун, чкадин авторрин эсеррикай ибарат антологиядин кьвед лагьай пай акъудун, кьилди-кьилди авторрин ктабар акъудуниз куьмекдай фонд тешкилун лазим тирди къейдна ва са жерге маса месэлаяр раижна.
Гуьруьшдал икьрар хьайивал, Дагъустандин писателрин Союздин 85 йисан юбилейдиз талукь яз шегьерда поэзиядин чIехи межлис кьиле тухун планламишнава.
Вичин рахунра Хизри Абакарова меденият вилик тухуник, агьалияр, иллаки жегьилар, ватанпересвилин руьгьдаллаз тербияламишуник чпин пай кутунай чкадин шаирриз ва гьикаятчийриз сагърай лагьана, вичин патай яратмишдай ксариз вири куьмекар гудайди хиве кьуна.
Нариман Къарибов
